دوو كێڵگه‌ى مين دواى پاككردنه‌وه‌يان ڕاده‌ستى خاوه‌نه‌كانيان دەكرێنەوە

ئاڤا نیوز

دوای پاككردنەوەی دوو كێڵگەی مین لە سەدان مین و تەقەمەنی نەتەقاوە، كە كەوتوونەتە قەزای شێخان لە پارێزگای دهۆك و ناحیەی قەرەهەنجیر لە نزیك كەركووك، ڕادەستی خاوەنەكانیان دەكرێنەوە.

 

چیرۆكی سەرەكی: ئەمڕۆ 28-4-2025، لیژنەی ڕادەستکردنەوەی کێڵگەمینەکان لە بەڕێوەبەرایەتيی گشتيی کاروباری مینى دهۆک، بەهاوکاريی ڕێکخراوی نێودەوڵەتيی ئامۆژگاريی مین (MAG)، لە سنووری شارۆچكه‌ى شێخان، کێڵگەمینێک بە ڕووبەری 206 هەزار مەتر دووجا دوای پاککردنەوەی، ڕادەستى خاوه‌نه‌كه‌ى كردەوە، لەو کێڵگەمینە نزيكه‌ى 200 مین و تەقەمەنی و پاشماوەی جەنگيی نەتەقیوە دۆزرانەوە و سەرجەمیان لەناوبران. هاوكات ليژنه‌ى ڕاده‌ستكردنه‌وه‌ى كێڵگه‌مينه‌كان له‌ بەڕێوەبەرایەتيی گشتيی کاروباری مینى سلێمانی، لە درێژەی کار و چالاکییەکانی له‌ شاره‌دێى قه‌ره‌هه‌نجير، زەوییەک کە پێشتر کێڵگەمین بووه‌، دواى له‌ناوبردنى سه‌رجه‌م مين و ته‌قه‌مه‌نييه‌كانى ناوى و پاككردنه‌وه‌ى‌، ڕاده‌ستى خاوه‌نه‌كه‌ى كرايه‌وه‌.

 

ڕاگەیێنراوی فەرمی: دەزگای گشتیی كاروباری مین لە ڕاگەیێنراوێكدا ئاماژە بەوە دەكات، هەوڵەكان چڕكراونەتەوە لەپێناو پاككردنەوەی سەرجەم خاكی هەرێمی كوردستان و ناوچە كوردستانییەكانی دەرەوەی هەرێم لە مین و تەقەمەنی، ئەوەش لەچوارچێوەی كارنامە و پلانی تۆكمەی كابینەی نۆیەمی حكومەتی هەرێمی كوردستان بۆ نەهێشتنی یەكجارەكیی مین و تەقەمەنی و پاشماوەی جەنگی.