وەزارەتی دارایی بۆ گەنجینەکان: چەکی پارەکانتان ئامادە بکەن

ئاڤا نیوز

 

وردبینیکردن لە لیستی مووچەی مانگی چوار تەواو بووە، پارەی مووچەخۆرانی هەرێمی کوردستان ئامادەیە و تەنیا ڕەزامەندی تەیف سامی ماوە، وەزارەتی داراییش گەنجینەکانی ئاگادارکردووەتەوە کە چەکی پارەکانیان ئامادە بکەن.

 

وێنە گەورەکە: هەفتەی ڕابردوو، وەزارەتی دارایی و ئابوور لیستی مووچە و تەرازووی پێداچوونەوە و بەشێک لە داهاتی نانەوتی ڕادەستی بەغدا کرد، ئەمەش وەک پابەندییەک بەرامبەر ئەو ڕێککەوتنەی لەگەڵ بەغدا کردوویەتی، بۆ ئەوەی لە کاتی خۆیدا مووچەی مووچەخۆرانی هەرێمی کوردستان بنێردرێت.

زانیاریی تایبەت: ئاڤا زانیویەتی، بەڕێوەبەرایەتیی ژمێرکاری لە وەزارەتی دارایی و ئابووری هەرێمی کوردستان گەنجینەکانی ئاگادارکردووەتەوە بۆ ئەوەی چەکەکانیان ئامادە بکەن، لەگەڵ وەرگرتنی ڕەزامەندی خەرجی دەست بکەن بە پێدانەوەی چەک بە بەڕێوەبەرایەتی و فەرمانگەکان بۆ خەرجکردنی مووچە.

ئەوەی پێویستە بیزانیت: هەموو مانگێک بەڕێوەبەرایەتی و فەرمانگەکان لیستی مووچەخۆرانیان دەدەن بە گەنجینەکان لەوێش دەکرێت بە چەک دوای ڕەزامەندی خەرجکردنی پارە، دوو چەک ئامادە دەکەن ئەوانەی بە کاش پارە وەرەگرن بە جیا و ئەوانەشی لە ڕێگەی هەژماری منن بەجیا بە فەرمانگەکانی دەدەنەوە بۆ ئەوەی لە بانک پارەکانیان وەرگرن.