عێراق هێنانی کرێکار لە پێنج وڵاتەوە قەدەغە دەکات

ئاڤا نیوز

 

وەزارەتی کار و کاروباری کۆمەڵایەتیی عێراق بڕیاری دا بەشێوەیەکی کاتی هێنانی کرێکارانی پێنج وڵات قەدەغە بکات.

 

وێنە گەورەکە: ژمارەی کرێکارانی بیانی لە عێراق یەک ملیۆنی تێپەڕاندووە و، بەگوێرەی ئامارە فەرمییەکان لە عێراق 43 هەزار کرێکاری بیانی هەن کە مۆڵەتی کارکردنیان هەیە، لەو ژمارەیەش بەشێکی زۆریان مۆڵەتی ساڵانەیان نوێ نەکردووەتەوە و ئێستاش لە وڵاتەکەدا کار دەکەن. بڕیار دراوە بەشێکی زۆریان دیپۆرتی وڵاتەکەی خۆیان دەکرێنەوە.

 
ڕاگەیێنراوی فەرمی: حەسەن خەوام، وتەبێژی وەزارەتی کار و کاروباری کۆمەڵایەتیی عێراق بە ئاڤای ڕاگەیاند: بەشێوەیەکی کاتی هێنانی کرێکارانی پێنج وڵات قەدەغە کران، ئەو وڵاتانەش بریتین لە: سووریا، ئیندۆنیزیا، پاکستان، بەنگلادیش و فلیپین.

 

زانیاریی زیاتر: ناوەڕاستی شوباتی ئەمساڵ، بەڕێوەبەرایەتیی نشینگە لە وەزارەتی ناوخۆ، دەستگیرکردنی نزیکەی سێ هەزار کرێکاری سەرپێچیکاری بیانی و دیپۆرتکردنەوەیان بۆ دەرەوەی عێراق ڕاگەیاند کە بەشی زۆریان هەڵگری وڵاتینامەی سووری، بەنگلادیشی و پاکستانی بوون.

 

لەلایەکی دیکە: ساڵی ڕابردوو تەنیا لە بەغدا 20 هەزار و 598 سەرپێچیکار دیپۆرت کراونەتەوە، هاوکات ژمارەکە بۆ هەموو عێراق گەیشتووەتە زیاتر لە 36 هەزار کەس.

 

ئەوەی پێویستە بیزانیت: ساڵی 2024،  ئەمینداریەتیی گشتیی ئەنجوومەنی وەزیران بڕیاریدابوو، دەبێت وەبەرهێنەر و خاوەنکاران کە تازە پڕۆژەکانیان دادەمەزرێنن 80٪ کرێکارەکانیان خۆماڵی دابمەزرێنن، لە بەرامبەردا 20٪ کرێکارەکانیان بیانی بن.