وەزارەتی خوێندنی باڵا داوای تەرخانکردنی بودجە بۆ دامەزراندنی سێ یەکەمەکان دەکات

ئاڤا نیوز

 

بۆ دامەزراندنی سێ یەکەمەکانی زانکۆکانی هەرێمى کوردستان و فەرمانبەرانی گرێبەستی وەزارەتەکەی، خوێندنی باڵا و توێژینەوەی زانستی داوا دەکات بودجەیان بۆ تەرخان بکرێت.

 

وێنە گەورەکە: وەزیری خوێندنی باڵا و توێژینەوەی زانستیی هەرێمی کوردستان لەبارەى پرسە هاوبەشەکانى نێوان ئەنجوومەنی ڕاژە و وەزارەتی خوێندنی باڵا و پرسی دامەزراندنى سێ یەکەمەکانى سەر ئاستى بەش و کۆلێژەکان لە زانکۆ و پەیمانگەکانى هەرێمى کوردستان لە ساڵانی خوێندنی (2017- 2018 تا 2021-2022) کۆبوونەوە.

 

ڕاگەیێنراوی فەرمی: وەزارەتی خوێندنی باڵا و توێژینەوەی زانستی ڕایگەیاند، بەمەبەستى گفتوگۆکردن لەبارەى پرسی دامەزراندنی سێ یەکەمەکانى زانکۆکانی هەرێمى کوردستان و فەرمانبەرانی گریبەستی وەزارەتی خوێندنی باڵا و توێژینەوەى زانستى  کۆبوونەوەى وەزیرى خوێندنى باڵاى هەرێمى کوردستان لەگەڵ سەرۆکى ئەنجوومەنى ڕاژەى حکومەتى هەرێم بەڕێوەچوو.

 

زانیاریی زیاتر: لە ڕاگەیێنراوەکەی خوێندنی باڵادا هاتووە، "مەبەستمانە پێکەوە هەماهەنگی بکەین بۆ ڕەخساندنی دەرفەتی کاری شایستە بۆ گەنجانی وڵاتەکەمان و سوود لە توانایان وەربگرین بۆ گەشەپێدانی هەمەلایەنەی وڵات و ڕێگر بین لە کۆچی هزر و تواناکانی گەنجان کە گرنگترین سەرمایەی وڵاتەکەمانن".

 

ئەوەی پێویستە بیزانیت: لە کۆبوونەوەکەی نێوان وەزارەتی خوێندنی باڵا و ئەنجوومەنی ڕاژە "بڕیاردرا بە ئامادەکردنى کۆنوسێکى هاوبەش لە نێوان وەزارەتى خوێندنى باڵا و توێژینەوەى زانستى و ئەنجوومەنى ڕاژە، لە ڕێگەى ئەنجوومەنى وەزیرانى هەرێمى کوردستان ئاراستەى لایەنە پەیوەندیدارەکان بکرێت، بۆ ئەوەى بودجەى پێویست بۆ دامەزراندنی سێ یەکەمەکان و فەرمانبەرانی گرێبەست تەرخان بکرێت".