45 ملیار دینار بۆ پارێزگاکانی سلێمانی و هەڵەبجە و ئیدارەی گەرمان و ڕاپەڕین خەرج دەکرێت

ئاڤا نیوز

وەزارەتی دارایی زیاتر لە 45 ملیار دینار بۆ پارێزگاکانی سلێمانی و هەڵەبجە، ئیدارەی گەرمیان و ڕاپەڕین خەرج دەکات.

ڕاگەیێنراوی فەرمی: وەزارەتی دارایی بڵاویکردەوە، بڕیار دراوە بە خەرجکردنی زیاتر لە 45 ملیار دینار بۆ دەرمان و پێداویستی تەندروستی سلێمانی و نەخۆشخانەی هیوا و شەقامی 100 مەتری سلێمانی و ڕێگای دووسایدی کەلار – دەربەندیخان، شایستەی کۆمپانیاکانی خۆڵ و خاشاک، پڕۆژە بەردەوامەکانی پارێزگای سلێمانی و هەڵەبجە و ئیدارەی گەرمیان و ڕاپەڕین.

- هەر لە چوارچێوەی بڕیارەکاندا بەڕێز وەزیری دارایی و ئابووری بڕیاریدا بە بەردەوامبوونی لیژنەی خەرجکردنی گەڕانەوەی ( التأمینات و خطاب الضمان ) ی بەڵێندەران لەسەرجەم بانکەکان، بەمەبەستی گەڕانەوەی پابەندییەکان بە پێی ڕێژە و گوژمەی دیاریکراو.  

ئەوەی پێویستە بیزانیت: وەزارەتی دارایی بەم شێوەیە پارەکانی خەرجکردووە: 

- چوار ملیار و پێنجسەد ملیۆن دینار بۆ خەرجی دەرمان بۆ بەڕێوبەرایەتیی گشتیی تەندروستیی سلێمانی.

- چوار ملیار دینار بۆ خەرجی دەرمان بۆ نەخۆشخانەی هیوا. 

- سێ ملیار و پێنجسەد ملیۆن دینار ، بۆ سەرجەم پڕۆژەکانی سلێمانی و دەوروبەری. 

- سێ ملیار دینار بۆ سەرجەم پرۆژەکانی ئیدارەی گەرمیان.

- دوو ملیار دینار بۆ سەرجەم پڕۆژەکانی ئیدارەی ڕاپەڕین.

- دوو ملیار دینار بۆ سەرجەم پڕۆژەکانی پارێزگای هەڵەبجە.

- پێنج ملیار دینار بۆ پڕۆژەی ڕێگای دوو سایدی کەلار – دەربەندیخان.

- بیست ملیار دینار وەک شایستەی دارایی پڕۆژەی شەقامی 100 مەتری سلێمانی (شاڕێی بابان).

- یەک ملیار و پێنجسەد ملیۆن دینار پارەی خۆڵ و خاشاک.