فایلی خەڵک؛ دروستکردنی سیاجێک بۆ دیوی پشتەوەی پرۆژەی گوندی کۆری کێشەی تێکەوتووە

ئاڤا نیوز 

گوندی کۆری یەکێکە لە پرۆژە نیشتەجێبوونەکانی هەولێر و دەکەوێتە پشتەوەی شەقامی 150 مەتری، دانیشتووانی پرۆژەکە دەڵێن، لەپێناو سەلامەتی خۆیان، لەسەر ئەرکی خۆیان بڕیاریان داوە سیاجەک دروست بکەن بەڵام لەلایەن پۆلیسەوە ڕێگرییان لێکراوە. 

 

وێنە گەورەکە: بەهۆی ئەوەی گوندی کۆری لە تەنیشت گوندی ئیسپانییە، دانیشتوانەکەی دەیانەوێت سیاجێک لە نێوانیان دروستبکەن بۆ ئەوەی سنووری هەردوو شارەکە لە یەکدی جیابکرێتەوە و تێکەڵی یەکدی نەکرێن. 

 

چیرۆکی سەرەکی: بەرەبەیانی ئەمڕۆ دانیشتوانی گوندەکە کرێکار و وەستا دەبەنە گوندەکە بۆ ئەوەی دەست بکەن بە دروستکردنی ئەو سیاجە، بەڵام لە پڕ مەفرەزەیەکی پۆلیس خۆی دەکات بە ناویان و ڕێگرییان لێ دەکات کارەکانیان ئەنجامبدەن، لەبەرامبەردا هەڵسان بە داخستنی دەروازەی گوندەکە بۆ ماوە چەند کاتژمێرێک. 

 

لێدوانی فەرمی: عەبدوڵڵا شەمسەدین، بەڕێوەبەری شارەوانی دوو بە ئاڤای ڕاگەیاند، ڕاستە ئەوانە ڕەزامەندیان بۆ دەڕچووە و من ئاگاداری نووسراوەکانم، بەڵام من مەفرەزەم نەناردووە و ئاگادار نیم.

 

باسی ئەوەش ئەکا، مەفرەزە  نەچووە تا کەس  دەستگیر بکەن، بەڵکو بۆ پاراستنی ئەوان نێردراون، دواتر نوێنەری دانیشتووانیش ڕێگاکەیان کردەوە تا ڕێگا چارەیەکی دیکەیان بۆ دەدۆزرێتەوە.

لەلایەکی دیکەوە: نەبەز عەبدولحەمید، قایمقامی هەولێریش بە ئاڤای گوت، بەپێی ئەو ڕێنماییانەی دەست ئێمە کەوتووە، نابێت دانیشتووان خۆیان هەستن بە دروستکردنی سیاجەکە، ئەبێ ئەندازیارێکی تایبەتمەند و لەلایەن حکومەتەوە سەرپەرشتی بکرێت.

وتیشی نووسراوەکانم لایە و رەزامەندی دراوە لە جێبەجێکردنی بەڵام ناکرێ لەخۆیانەوە دیوار دابنێن ئەبێ سەرپەرشتیاری هەبێ

 

گوندی كۆری له‌ ساڵی 2014 به‌ پێی رێككه‌وتنێكی نێوان حكومه‌تی هه‌رێم و كۆمپانیایه‌كی كۆریای باشوور لە ھەولێر لەسه‌ر رووبه‌ری هه‌زار و 592 دۆنم زەوی، بڕیاری دروستکردنی درا، کە بریتیبوو لە پێنج هه‌زار و 304 یەکەی نیشتەجێبوون، نزیکەی هه‌زار و 200 لەو خانووانە دابەش کران،