ڤانس: شەڕی ئۆکراینا بەم زووانە کۆتایی نایەت

ئاڤا نیوز

جێگری سەرۆکی ئەمریکا لە چاوپێکەوتنێک ڕایدەگەیێنێت، جەنگی ئۆکراینا و ڕووسیا بەمزووانە کۆتایی نایەت و پێویستە ڕووسیا و ئۆکراینا خۆیان بڕیار بدەن کۆتایی بەو شەڕە بهێنن.

وێنە گەورەکە: جەی دی ڤانس، جێگری سەرۆکی ئەمریکا لە چاوپێکەوتنێک پشتگیری لە سیاسەتەکانی دۆناڵد ترەپ، سەرۆکی ئەمریکا دەکات و ئاماژە بە هەوڵەکانی ئەمریکاش لەبارەی وەستانی جەنگی نێوان ڕووسیا و ئۆکراینا دەکات.

لێدوانی فەرمی: ڤانس ڕایگەیاند جەنگی نێوان ڕووسیا و ئۆکراینا بەم زووانە کۆتایی نایەت. ئەو گوتیشی هەوڵی ئەمریکا بۆ ئەوەیە ئەو دوو لایەنە شەڕکەرە بگەیێنێتە خاڵێک کە بتوانن تیایدا لە سەر ئاگربەست و ئاشتی ڕێک بکەون.

 - ڤانس ئەوەشی گوتووە، وەستانی شەڕ دەوەستێتە سەر ڕووسیا و ئۆکراینا و دەبێت ئەوان خۆیان ئەو بڕیارە بدەن و کۆتایی بەم شەڕە بهێنن کە زیاتر لە سێ ساڵە هەڵگیرساوە. 

ئەوەی پێویستە بیزانیت: ئەم لێدوانەی ڤانس لە کاتێکدایە ئەمریکا لەگەڵ ئۆکراینا ڕێککەوتنێکی واژۆ کردووە تا ئەمریکا لە بەرامبەر یارمەتیدانی ئۆکراینا سوود لە سەرچاوەی کانزا دەگمەنەکانی ئەو وڵاتە ببینێت و پشکی تیایاندا هەبێت.