پەکەکە: بڕیارێکی ستراتیژی دەدەین

ئاڤا نیوز

ناوەندی ڕاگەیاندن و چاپەمەنیی هێزەكانی پاراستنی گەل 'هەپەگە' ڕایدەگەیەنێت، لەم قۆناغە مێژووییەدا، لە سەروبەندی بڕیارێكی ستراتیژداین بۆ ئایندەی گەلی كورد و مەبەستمان نییە ململانێ لەگەڵ هیچ لایەنێك دروست بكەین.

وێنە گەورەكە: دوای دەیان ساڵ لە شەڕی بەردەوامی نێوان پەكەكە و سوپای توركیا، ئێستا دەرفەتێكی گرنگ بۆ پرۆسەی ئاشتی لەو وڵاتە هاتووەتە كایەوە، ئەوەش دوای ڕازیبوونی پەكەكە بە داواكارییەكەی عەبدوڵڵا ئۆجەلان، ڕێبەری زیندانیکراوی پارتی کرێکارانی کوردستان 'پەكەكە' بە چەكدانان و خۆهەڵوەشاندنەوەی بە مەرج.

ڕاگەیێنراوی فەرمی: ناوەندی ڕاگەیاندن و چاپەمەنی هێزه‌كانی پاراستنی گه‌ل 'هەپەگە' ئه‌مڕۆ له‌ ڕاگه‌یه‌ندراوێكدا كە لە میدیای 'ستێرك تیڤی' بڵاوكراوەتەوە، ڕایگەیاندووە، "لەم قۆناغە مێژوییەدا، کە ئێمە لە سەروبەندی بڕیارێکی ستراتیژیداین بۆ ئایندەی گەلەکەمان و بزووتنەوەکەمان، نامانەوێت گرژیی و ململانێ لەگەڵ کەس دروست بکەین. بەپێچەوانەوە دەمانەوێت لە چوارچێوەی پرۆسەی ئاشتی و کۆمەڵگەی دیموکراسیی ئۆجەلان لە ڕێگەی دیالۆگ لەگەڵ هەمو لایەک کێشەکانمان چارەسەر بکەین".

باکگراوند: دوای زنجیرەیەك سەردانی شاندی دەم پارتی بۆ ئیمرالی و كۆبوونەوەیان لەگەڵ عەبدوڵڵا ئۆجەلان، ڕێبەری زیندانیکراوی پارتی کرێکارانی کوردستان 'پەكەكە'، هەنگاوی گەورە و مێژوویی بۆ سەركەوتنی پرۆسەی ئاشتی لە توركیا نرا، كاتێك ئۆجەلان داوای لە پارتەكەی كرد چەك دابنێن و خۆیان هەڵبوەشێننەوە.

بە تەنیشت ئەم بابەتەوە: ڕۆژی 10ـی نیسانی ڕابردوو، شاندی دەم پارتی دوای 13 ساڵ بۆ یەکەمجار لەگەڵ ڕەجەب تەیب ئەردۆغان، سەرۆککۆماری تورکیا  لە کۆشکی کۆماری کۆبوونەوە، چاوەڕێ دەکرێت دوای ئەم کۆبوونەوەیە گۆڕانکاری گەورە و خێرا لە پرۆسەی ئاشتی ڕووبدات.