لە هەولێر گەنجێك بە دەستڕێژی گوللـە خوشكی خۆی دەكوژێت

 

ئاڤا نیوز

لە هەولێر، گەنجێک بە 11 فیشەك كۆتایی بە ژیانی خوشكەكەی دێنێت و دوای كەمتر لە دوو کاتژمێر لە ئەنجامدانی تاوانەكەی، بكوژ دەستگیر دەكرێت.

چیرۆكی سەرەكی: ئەمڕۆ شەممە 2025-05-03، لە گەڕەكی تەیراوەی ناوجەرگەی هەولێر، لەسەر كێشەیەكی كۆمەڵایەتی، گەنجێك خوشكەكەی خۆی بە دەستڕێژی گوللە دەكوژێت و هەڵدێت، بەڵام دوای كەمتر لە دوو كاتژمێر لە تاوانەكەی، دەستگیر دەكرێت.

ڕاگەیێنراوی فەرمی: بەڕێوەبەرایەتیی پۆلیسی هەولێر لە ڕاگەیێنراوێكدا بڵاویكردووەتەوە، "دوای ئەوەی ئاگاداركراینەوە بە ڕووداوی كوشتنەكە، دەستبەجێ تیمەكانمان گەیشتنە شوێنی ڕووداوەكە، لە لێكۆڵینەوەكاندا بۆمان دەركەوت، كەوا كچێك بە ناوی (ن. أ. ع) لەلایەن براكەی بەناوی (ع. أ. ع) لەسەر كێشەیەكی كۆمەڵایەتی كوژراوە. دوای کەمتر لە دوو کاتژمێر، تۆمەتبار لەلایەن تیمەکانی بەڕێوەبەرایەتیی پۆلیس دەستگیرکرا، بەپێی ماددەی 406 لە یاسای سزادانی عێراق پەڕاوی لێکۆڵینەوەی بۆ کرایەوە.

زانیاریی بەدەستهاتوو: كچە كوژراوەكە تەمەنی 17 ساڵە و بەر لەوەی لەلایەن براكەیەوە بکوژرێت، لەسەر كێشەیەكی كۆمەڵایەتی بووەتە دەمەقاڵێیان.