چوار بەنداوی گەورە لە هەرێمی كوردستان دروست دەكرێن

ئاڤا نیوز

چوار بەنداوی گەورە لە هەرێمی كوردستان دروست دەكرێن، بەڕێوەبەری بەنداوەكانی پارێزگای دهۆكیش ئاشكرای دەكات، لیژنەی هونەریی هاوبەشی هەردوو حكومەتی هەرێمی كوردستان و عێراق، پێكهێندراون بۆ دیراسەكردنی وردەكاری پرۆژەكان.

وێنە گەورەكە: لەپێناو مسۆگەركردنی ئاسایشی ئاو و پاراستنی وڵات لە زیانەكانی وشكەساڵی، ساڵ و نیوێك لەمەوبەر سەرۆكوەزیران مەسرور بارزانی، داوای پاڵپشتی لە سەرۆكوەزیرانی عێراق كرد، بۆ دروستكردنی چوار بەنداوی گەورەی ستراتیژی لە هەرێمی كوردستان، دوای ئەو داواكارییە، محەممەد شیاع سوودانی، سەرۆكوەزیرانی عێراق ڕەزامەندی دا لەسەر دروستكردنی چوار بەنداو لەسەر بودجەی عێراق.

لێدوانی فەرمی: فەرهاد محەممەد، بەڕێوەبەری بەنداوەکانی پارێزگای دھۆک تایبەت بە ئاڤا ڕایگەیاند، بە هەوڵ و ڕژدبوونی سەرۆكی حكومەتی هەرێمی كوردستان، حكومەتی فیدراڵی ڕەزامەندی داوە لەسەر جێبەجێكردنی پرۆژەی دروستكردنی چوار بەنداوی گەورە لە هەرێمی كوردستان، بۆ ئەم مەبەستەش لیژنەی هونەریی هاوبەش لەنێوان هەردوو حكومەت پێكهێنراوە بۆ دیاریكردنی شوێنەكان و داڕشتنی دیزاینی بەنداوەكان.

زانیاریی زیاتر: یەکێک لەو بەنداوانەی كە بڕیارە دروستبكرێن، بەنداوی مەنداوەیە كە دەكەوێتە هەردوو سنووری پارێزگای هەولێر و دهۆك و بە پرۆژەیەكی ستراتیژی و گرنگ، هەژمار دەكرێت.

بۆچی گرنگە: دروستكردنی چوار بەنداو، جگە لە سوودی ژینگەیی و پاراستنی ئاسایشی ئاو، سوودێكی زۆری بۆ هەرێمی كوردستان دەبێت لە كەرتەكانی بەرهەمهێنانی "كارەبا، گەشتوگوزار، كشتوكاڵ، ئاژەڵداری، سامانی ماسی" و زۆر بابەتی دیكە.