بەهۆی پابەند نەبوون بە ڕێنماییەکانی حکومەت کۆمپانیای تەڵەبات هەڕەشەی سزادانی لەسەرە

ئاڤا نیوز

لە هەنگاوێکی نوێدا وەزارەتی ناوخۆی حکومەتی هەرێمی کوردستان کار لەسەر ئەوە دەکات، تاکسی کارەبایی و هایبرێد بکرێت بە هۆکاری گواستنەوەی خواردنی دیلیڤەری، بەم نزیکانەش یەكێک لە کۆمپانیاکانی دیلیڤەری سزا دەدرێت.

چیرۆکی سەرەکی: دەربارەی کەمکردنەوەی ئەو ماتۆڕسکیلانەی کە کە دەنگیان بەرزە و هۆکارن بۆ پیسکردنی ژینگە، ماوەیەک پێش ئێستا بڕیارێک دەرچوو لە شەقامەکانی 120 و 150 مەتری هەولێر ماتۆڕسکیل قەدەغە کران، ئێستا لە وەزارەتی ناوخۆ ڕێنمایی دەکراوە بۆ ئەو کۆمپانیانەی کە بە ماتۆڕسکیل کاری دیلیڤەری دەکەن دەبێت ماتۆڕەکان کارەبایی بن یان بێدەنگ.

زانیاریی بەدەستهاتوو: ئێستا چوار کۆمپانیا لە هەرێمی کوردستان کاری دیلیڤەری دەکەن. ئاڤا لە وەزارەتی ناوخۆ زانیویەتی سێ لە کۆمپانیاکان بە مەرج و رێنماییەکان پابەند بوون، بەڵام کۆمپانیایەکیان پابەند نەبووە، کە تەڵەباتە. هۆشداری بە کۆمپانیاکە دراوە ئەگەر ئەم هەفتەیە پابەندبوونیان ڕانەگەیێنن سزایان دەدەن، سزاکانیش تووندن و ڕەنگە بگاتە داخستنیش.

زانیاریی زیاتر: ئاڤا زانیویەتی هۆکاری پابەند نەبوون بە مەرجەکان ئەوەیە، کۆمپانیای تەڵەبات کار لەگەڵ خەڵک دەکات و ماتۆرەکانی هی خۆی نین، بۆیە ناتوانن شۆفێری ماتۆرەکان پابەند بە مەرجەکان بکەن، بۆ نموونە یەک جلوبەرگ، کڵاو و جلوبەرگی سەلامەتی،  گۆڕینی ماتۆرەکان بۆ کارەبایی.

بۆچوونی لایەنی بەرامبەر: بەڕێوەبەرێک لە کۆمپانیای تەڵەبات بە ئاڤای گوت، مەرجەکانی وەزارەتی ناوخۆ لەجێی خۆیەتی و ئەم هەفتەیە دانیشتمان هەیە و کار لەسەر ئەوە دەکەین جێبەجێیان بکەین.

لەلایەکی دیکەوە: لە هەنگاوێکی نوێدا وەزارەتی ناوخۆی حکومەتی هەرێمی کوردستان کار لەسەر ئەوە دەکات، تاکسی کارەبایی و هایبرێد بکرێت بە هۆکاری گواستنەوەی کاری دیلیڤەری.

ئەوەی پێویستە بیزانیت: وەزارەتی ناوخۆ دەیەوێت کۆمپانیاکانی دیلیڤەری ناچار بکات و ئاسانکاری بۆ ئۆتۆمبێلانە دەکات کە کارەبایی و هایبرێدن بۆ ئەوەی کاری دیلیڤەری بکەن، ئەمەش دیراسەی لەسەر کراوە و لەماوەی داهاتوو جێبەجێ دەکرێت، خەرجیان لە ماتۆڕسکیل کەمترە.