هەزاران خانەنشین 17 مووچە بەیەکەوە وەردەگرن

ئاڤا نیوز

کارکردن لە دۆسیەی خانەنشینان بەردەوامی هەیە و مانگی پێنج هەزاران خانەنشین 17 مووچە بەیەکەوە وەردەگرن، پێنج مووچەیان هی پێنج مانگەکەی ئەمساڵ و 12 مووچەش ئیکرامیەی خانەنشینییە.

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینی بە ئاڤای وت:

٠ تا مانگی چوار دۆسیەی شەش هەزار و 700 خانەنشین تەواو کرا. مانگی ڕابردوو لەگەڵ مووچەی مانگی سێ، هەزار و 610 خانەنشین مووچەکانیان بۆ هاتەوە، ئەم مانگەش سەروو دوو هەزار خانەنشینی دیکە مووچەیان بۆ دێتەوە.

٠ مانگەکانی ڕابردوو بۆیە 12 مووچەکەی ئیکرامییە خەرج نەکراوە، چونکە هەندێک کێشە لەنووسراو و دۆسیەی لقەکانی خانەنشینی هەبوو، وەزارەتی دارایی عێراقیش وتویانە چاکی بکەن و هەموویمان بەیەکەوە بۆ بنێرن، بۆ ئەوەی مانگی پێنج بەیەکەوە بۆیان خەرج بکەین.

زانیاریی زیاتر: سەبارەت بە 12 مووچەکەی ئیکرامیەی خانەنشینی، بەغدا بڕیاریداوە لەگەڵ مووچەی مانگی پێنج هەمووی بەیەکەوە سەرف بکات. کە ژمارەیان نزیکەی سێ هەزار خانەنشینە.

ئەوەی پێویستە بیزانیت: ئیکرامیەی 12 مووچەکە بۆ ئەو خانەنشینانەیە کە 25 ساڵ خزمەتیان هەیە لەگەڵ شەش مانگیش مۆڵەتی کۆکراوە.