ڕوونکردنەوەیەک لە پۆلیسی هەولێرەوە لەبارەی گیانلەدەستدانی دوو هاووڵاتی

ئاڤا نیوز

بەڕێوەبەرایەتی پۆلیسی پارێزگای هەولێر، لەسەر ڕووداوەکەی دوو شەو پێش ئێستای شەقامی 40 مەتری کە بووە هۆی گیانلەدەستدانی دوو کەس، ڕوونکردنەوەیەک بڵاودەکاتەوە و ئاماژە بەوە دەدات تۆمەتبار بە فەرمانی دادوەر ڕاگیراوە.

چیرۆکی سەرەکی: شەوی 04-12-2025، لە شەقامی40 مەتریی شاری هەولێر، ئۆتۆمبێلێکی جۆری (تۆیۆتا ژمارە 5427 وەزارەتی پێشمەرگە) خۆی کێشاوە بە ئۆتۆمبێلێکی جۆری مارسیدیس کە شوفێرەکەی لە بەردەم شووقەکانی پڕۆژەیەک وەستاوە و قسەی لەگەڵ دوو کارمەندی سکیوریتی کردووە بە مەبەستی چوونەژوورەوە، لە ئەنجامدا هەردوو کارمەندی سکیوریتی پڕۆژەیەک بە ناوەکانی (محەممەد سەردار موحسین) و (ئەحمەد محەممەد شەریف) بە هۆی پێکدادانەکەوە گیان لەدەست دەدەن و زیانێکی زۆریش بەر ئۆتۆمبێلی جۆری مارسیدیس دەکەوێت.

ڕاگەیێنراوی فەرمی: بەگوێرەی ڕاگەیێنراوی فەرمی پۆلیسی هەولێر، لە لێکۆڵینەوەکاندا دەرکەوتووە شوفێری تۆیۆتاکەی وەزارەتی پێشمەرگە بەناوی (م. ٲ. م) ماددەی کحولی بەکارهێنابوو، 100% لە ڕووداوەکە کەمتەرخەم بووە، ئێستا بەپێی ماددەی 24ـی هاتووچۆ ڕاگیراوە و لێكۆڵینەوە لەگەڵیدا بەردەوامە.

زانیاریی زیاتر: ئەو دوو سکیوریتییەی بەهۆی ڕووداوەکە گیانیان لەدەستداوە، پێش ڕووداوەکە لەگەڵ شوفێری مارسیدسەکە گفتوگۆی چوونە ژوورەوەیان بووە، بۆ ئەوەی ڕێگەی بدەن بچێتە نێو پڕۆژەکە، لەو کاتەدا شوفێری تۆیۆتاکەی وەزارەتی پێشمەرگە هاتووە و خۆی بە مارسدیسەکە کێشاوە و ئەو دوو سکویریتییەش بەرکەوتوون و گیانیان لەدەستداوە.