کرێملین: دیداری نێوان پووتین و ترەمپ پێویستە

ئاڤا نیوز

وتەبێژی کریملێن لەبارەی سەردانەکەی ترەمپ بۆ ڕۆژهەڵاتی ناوەڕاست و ئەگەری کۆبوونەوەی لەگەڵ پووتین ڕایگەیاند، کۆبوونەوەکە پێویستە، بەڵام هیچ وردەکارییە بۆ ئێستا نییە.

وێنە گەورەکە: بڕیارە لەم مانگەدا ترەمپ بەسەردانێک گەشتێک بەنێو ڕۆژهەڵاتی ناوەڕاستدا بکات، هاوکات دوای سەردانەکەی بۆ ڕۆژهەڵاتی ناوەڕاست، ترەمپ دەیەوێت چاوی بە پووتین بکەوێت.

لێدوانی فەرمی: دیمیتری پیسکۆڤ، وتەبێژی کریملێن لە وەڵامی پرسیارێکدا سەبارەت بە ئەگەری کۆبوونەوەی نێوان ڤلادیمێر پووتین، سەرۆکی ڕووسیا و دۆناڵد ترەمپ، سەرۆکی ئەمریکا لە سعوودیە ڕایگەیاند، کۆبوونەوەکە پێویستە، بەڵام پووتین پلانی نییە بچێت بۆ ڕۆژهەڵاتی ناوەڕاست.

- کۆبوونەوەی لەو جۆرە پێویستی بە هەوڵێکی زۆر دەبێت، بەڵام ئێستا هیچ وردەکارییەکی دیاریکراو نییە.

لەلایەکی دیکەوە: ترەمپ پێشتر لەبارەی دیدارەکە وتی، پێناچێت لە سعوودیە دیدار لەگەڵ پووتین بکەم، بەڵام دوای سەردانەکەی سعوودیە لەگەڵی کۆدەبمەوە.

ئەوەی پێویستە بیزانیت: بڕیار وایە لەناوەڕاستی مانگی ئایار لەنێوان ڕۆژانی 13 و 14 ئەم مانگە، ترەمپ سەردانی سعوودییە بکات، ئەمەش لە خولی دووەمی سەرۆکایەتییەکەی یەکەم گەشتی دەبێت بۆ ڕۆژهەڵاتی ناوەڕاست.