کوێخا دێرین گەڕاوە؛ چۆن دەستگیر کرا و لەکوێیە؟

ئاڤا نیوز

دوای زیاتر لە ساڵێک لە جێهێشتنی شاری سلێمانی بەهۆی بوونی فەرمانی دەستگیرکردن، ئەمڕۆ کوێخا دێرین عوزێری گەڕایەوە و لەلایەن هێزەکانی ئاسایش دەستگیرکرا.

چیرۆکی سەرەکی: کوێخا دێرین عوزێری، کە پلەدارێکی هێزی پێشمەرگەی سەربە یەکەی 70ـی یەکێتی بوو، سەرەتای ساڵی ڕابردوو، لەلایەن هێزەکانی ئاسایشی یەکێتییەوە دیوەخانەکەی ڕووخێنراو دەست بەسەر ماڵ و حاڵیدا گیرا. دواتر دەربازی بوو و چووە دەرەوەی وڵات.

دوای دەربازبوونی بۆ دەرەوەی وڵات، ئاسایشی یەکێتی ڕوونکردنەوەیەکی لەوبارەیەوە بڵاوکردەوە و وتی ''بە داواکردنی سەرانە و پارە وەرگرتن لە سەرمایەدارێک، بڕیاری دەستگرتن بەسەر ماڵ و سامانی کوێخا دێرین دەرکراوە".

زانیاریی زیاتر: لە ماوەکانی ڕابردوو بە ئامادەبوونی چەندین کەسایەتی دیاری سلێمانی، کێشەی کوێخا دێرین بە سوڵحی عەشایەری چارەسەر کرا. لێکتێگەیشتنیش هەبووە لەنێوان عەشیرەتی عوزێری و بەرپرسانی باڵای یەکێتی، ویستوویانە ئاشت ببنەوە.

چی ڕوویدا: دوای زیاتر لە ساڵێک ئەمڕۆ کاتژمێر دووی بەرەبەیان كوێخا دێرین گەڕاوەتەوە بۆ سلێمانی، بەڵام لەگەڵ گەیشتنی لەناو فڕۆكەخانەی سلێمانی لەلایەن هێزێكی دژەتیرۆری سڵێمانی دەستگیر دەکرێت و  ڕادەستی ئاسایشی سلێمانی دەکرێت. بەهۆی ئەوەی فەرمانی دەستگیرکردنی لەلایەن حاکمی ئاسایشی سلێمانی هەبوو، ئێستا دەستبەسەر کراوە، دیاریش نییە ئەمڕۆ یان بەیانی بە کەفەلەت ئازاد دەکرێت، یاخود هەر لە زیندان دەمینێتەوە

ئەوەی پێویستە بیزانیت: پێش گەڕانەوەی بۆ سلێمانی، بەڵێنی ئەوە بە كوێخا دێرین دراوە ئەو سكاڵاو دۆسیانەی كە لە دادگا لەسەری تۆماركراون دادەخرێن و سەرجەم گرفتەكانی بۆ چارەسەر دەكرێت، بەڵام ڕێگەی پێنادرێت جارێكی دیكە قەڵای عوزرێییەكان دروست بكاتەوە.

لێدوانی فەرمی: خزمێکی کوێخا دێرین بە ئاڤای ڕاگەیاند: دوای زیاتر لە ساڵێک کێشەکەی چارەسەر کراوە.

لەلایەکی دیکەوە: عەقید سەلام عەبدولخالق، وتەبێژی دەزگای ئاسایشی هەرێم بە ئاڤای گوت: دێرین عوزێری دەستگیر کراوە و ئەمڕۆ براوەتە بەردەم دادوەر، ناوبراو لەماوەی ڕابردوودا فەرمانی دەستگیرکردنی هەبووە و ئەمڕۆش دواى دەستگیرکردنى ڕووبەرووی یاسا کرایەوە.