محەممەد شیاع سوودانی: پەکەکە ڕێکخراوێکی قەدەغە کراوە

ئاڤا نیوز

 

سەرۆکوەزیرانی عێراق لەئەنقەرەوە ڕایگەیاند، ڕووبەڕووبوونەوەی تیرۆر بناغانەی پەیوەندیەکانی نێوان عێراق و تورکیایە و پرسی ئاویش یەکێکە لە بابەتە هەستیارەکان.

 

چیرۆکی سەرەکی: ئەمڕۆ پێنجشەممە، محەممەد شیاع سوودانی، سەرۆکوەزیرانی عێراق بە یاوەری شاندێکی باڵا گەیشتە ئەنقەرە و لەلایەن ڕەجەب تەیب ئەردۆغان، سەرۆککۆماری تورکیا پێشوازیان لێکرا.

 

ڕاگەیێنراوی فەرمی: سەرۆککۆماری تورکیا و سەرۆکوەزیرانی عێراق لە کۆنفڕانسێکی ڕۆژنامەوانیدا ناوەڕۆکی ڕێککەوتننامەیەکی 11 خاڵیان خستەڕوو کە چەندین بواری جیاواز لەخۆ دەگرێت لەوانە؛ هاوبەشیکردن لە پرسی سەربازی و ڕووبەڕووبوونەوەی تیرۆر، گۆڕانکارییەکانی کەشوهەوا و بەرەنگاربوونەوە و ڕێگریکردن لە بازرگانی بە ماددە هۆشبەرەکان.

 

لێدوانی فەرمی: سەرۆکوەزیرانی عێراق لەمیانەی کۆنفڕانسە ڕۆژنامەوانییەکەدا ڕایگەیاند: بەگوێرەی دەستووری عێراق چالاکی ڕێکخراوی پارتی کرێکارانی کوردستان "پەکەکە" قەدەغە کراوە. 

 

- یەکێک لە ستوونە سەرەکییەکانی کە ئەمڕۆ گفتوگۆمان لەبارەوە کردووە، پرسی ڕووبەڕوونەوەی تیرۆرە کە مەترسییە بۆ سەر هەردوو وڵات.

- لەگەڵ تورکیا جەختمان لە کاری هاوبەشکردووەتەوە بۆ پرسی ئاڵوگۆڕکردنی زانیاری لەپێناو بەر قەرارکردنی ئاسایشی بەردەوام. 

- بەهۆی نەبوونی ئاوی کۆگاکراوەوە عێراق بەدۆخێکی ناهەمواردا تێپەڕ دەبێت. 

- پرسی ئاو بۆ عێراق هەستیارە، حکومەتەکەمان بەگوێرەی ڕێککەوتنە هاوبەشەکان لەگەڵ وڵاتانی دراوسێ مامەڵە دەکات.

- هاوکارییەکی بەرفراوان لە نێوان عێراق و تورکیا لە بواری بازرگانی و وەبەرهێناندا هەیە.

- عێراق دەستوەردان لە کاروباری ناوخۆی وڵاتانی دیکە ڕەتدەکاتەوە، ئەو بابەتەش یەکێکە لەبەرنامەی کاری حکومەتەکەی.

یاداشتەکانی لێکتێگەیشتن پێکهاتوون لەم چەند خاڵە:-

- لە بواری بەرەنگاربوونەوەی ماددەی هۆشبەر.
- لە بواری پەیوەندییە دیجیتاڵییەکان.
- لە بواری فریاگوزاری لە کاتی کارەساتەکاندا.
- کردنەوەی لقی زانکۆکانی تورکیا لە بەغدا و بەسرە.
- هاوکاری ڕاهێنانی وەزارەتی ناوخۆی عێراق.
- لە بواری پیشەسازیی بەرگری و ئاڵوگۆڕی زانیاری.
- لە بوارەکانی دادپەروەریدا.