ئەمریکا ئامادەیە نێوەندگیریی هیندستان و پاکستان بکات

ئاڤا نیوز

 

مارکۆ ڕۆبیۆ، وەزیری دەرەوەی ئەمریکا، پشتگیریی ئەمریکای بۆ دەستپێکردنی "گفتوگۆی بونیادنەر" لە نێوان هیندستان و پاکستان نیشان دا.

وێنە گەورەکە: ڕۆژی سێشەممە 22-4-2025، گرووپێکی چەکدار هێرشیان کردە سەر هەرێمی کشمیر. دوای ئەو ڕووداوە هیندستان، پاکستانی بەوە تۆمەتبارکرد کە دەستی لەو هێرشەدا هەبووە. پاش تۆمەت و هەڕەشەکانی هەردوولا بۆ سەر یەکدی، لە چەند ڕۆژی ڕابردوودا هیندستان وەک وەڵامێک بۆ پاکستان، هێرشێکی مووشەکی کردە سەر چەند پێگەیەک لە ناو خاکی پاکستان.

 

لێدوانی فەرمی: ڕۆبیۆ لەمیانی گفتوگۆیەکیدا لەگەڵ عاسم مونیر، سوپا سالاری پاکستان، ڕایگەیاندوە کە ئەمریکا ئامادەی نێوەندگیریی نێوان ئەم دوو دراوسێیەیە کە لە گرژیدان.

 

لەلایەکی دیکە: تامی بروس، وتەبێژی وەزارەتی دەرەوەی ئەمریکا ڕایگەیاند، ڕۆبیۆ سوور بووە لەسەر ئەوەی هیندستان و پاکستان ڕێگاچارەیەک بۆ کەمکردنەوەی گرژییەکان بدۆزنەوە و پێشنیازی ئەوەی کردووە کە ئەمریکا لەمەدا هاوکاریان بێت تا گفتوگۆیەکی بونیادنەر ئەنجام بدەن.

 

زانیاریی زیاتر: پێشتریش چین داوای لە هەردوو دەوڵەتەکە کردبوو کە لە هەر جۆرە گرژییەکی زیاتر دوور بکەونەوە.