حکومەتی تاڵیبان یاریی شەترەنج قەدەغە دەکات

ئاڤا نیوز

حکومەتی تاڵیبان بڕیاری قەدەغەکردنی یاری شەترەنجی لە سەرانسەری ئەفغانستان دەرکرد، بەو پاساوەی کە ئەم یارییە پشت بە شانس دەبەستێت و پێشێلی بنەماکانی ڕەوشت دەکات.

وێنە گەورەکە: لەو کاتەوەی بزووتنەوەی تاڵیبان لە ئەفغانستان دەسەڵاتی گرتووەتەوە دەست، چەندین شتی قەدەغەکردووە، لە بواری وەرزشی پێشتر یاریی هونەرە جەنگییە تێکەڵاوەکانی بە بیانووی تووندوتیژی قەدەغەکردبوو.

لێدوانی فەرمی: ئەتاڵ ماشوانی، وتەبێژی بەڕێوەبەرایەتی وەرزش لە ئەفغانستان بە ئاژانسی فرانس پرێسی ڕاگەیاند، ئەم یارییە وەک "ئامرازێک بۆ قومارکردن بە پارە" لێکدراوەتەوە، کە بەپێی یاسای "فەرمان بە چاکە و نەهی لە خراپە" کە ساڵی ڕابردوو دەرچووە، کارێکی قەدەغەکراوە.

لەهەمان کاتدا: ماشوانی ڕایگەیاند، بەهۆی ئەوەی کە بابەتەکە پەیوەندی بە بابەتی ئایینییەوە هەیە، یاری شەترەنج لە ئەفغانستان بەشێوەیەکی کاتی هەڵدەپەسێردرێت تاوەکو چارەسەرێک بۆ ئەم کێشەیە دەدۆزرێتەوە.

لەلایەکی دیکەوە: عەزیزوڵڵا جولزادەی تەمەن 46 ساڵ، خاوەنی کافێیەک لە کابول کە شوێنێکی سەرەکی بوو بۆ یاریکەرانی شەترەنج، دەڵێت: "سەرەڕای ئەوەی قەناعەتم بە بەڵگە ئایینییەکان نییە، بەڵام ناچارم بڕیارەکە جێبەجێ بکەم. ئەگەرچی زۆربەی وڵاتانی ئیسلامی یاریزانی ئاستبەرزی شەترەنجیان هەیە کە بەشداری لە پێشبڕکێ نێودەوڵەتییەکان دەکەن، ئەوانەی دێنە ئێرەش یاری دەکەن، لەسەر پارە نایکەن.

باکگراوند: تاڵیبان بۆ دووەم جار لە مێژووی ئەفغانستاندا لە مانگی ئابی ساڵی 2021 دوای کشانەوەی هێزەکانی ئەمریکا و هاوپەیمانان هاتەوە سەر دەسەڵات. ئەم گرووپە پێشتریش لە ساڵانی 1996 تا 2001 دەسەڵاتیان بەدەستەوە بوو.