حەماس: دانوستانمان لەگەڵ ئەمریکا ئەنجامداوە

ئاڤا نیوز

بەرپرسانی بزووتنەوەی حەماس لە دەوحەی پایتەختی قەتەر دانوستانی ڕاستەوخۆیان لەگەڵ ئەمریکا ئەنجامداوە.

لێدوانی فەرمی: سەرکردەیەکی بزووتنەوەی حەماس کە ئەندامی مەکتەبی سیاسی بزووتنەوەکەیە، بە ئاژانسی فرانس پرێسی ڕاگەیاند، ماوەی چەند ڕۆژێکە گفتوگۆی ڕاستەوخۆ لە نێوان سەرکردایەتی بزووتنەوەی حەماس و ئەمریکا لە دەوحە بەردەوامە سەبارەت بە ئاگربەست لە غەززە، ئاڵوگۆڕی دیلەکان و هاتنە ناوەوەی هاوکارییەکان.

لەلایەکی دیکەوە: بەرپرسێکی دیکەی بزووتنەوەی حەماس بە ئاژانسی فرانس پرێسی ڕاگەیاندووە، دانوستانەکانی نێوان سەرکردایەتی حەماس و ئەمریکا بە ئامانجی گەیشتن بە ڕێککەوتنی ئاگربەست بووە لە غەززە. دانوستانەکان تەرکیزیان لەسەر دەستەبەرکردنی ئاگربەست بوو کە بۆ ماوەی 70 ڕۆژ بەردەوام دەبێت، و بۆ ماوەی 90 ڕۆژ درێژدەکرێتەوە. ڕوونیشیکردەوە، تا ئێستا هیچ ڕێککەوتنێکی کۆتایی نەکراوە، بەڵام گفتوگۆکان لەگەڵ شاندی ئەمریکا بەردەوامن.

بڵاوکراوەی فەرمی: کەناڵی 12ـی ئیسرائیل ڕایگەیاندووە، ڕۆژی دووشەممە ستیڤ ویتکۆف نوێنەری ترەمپ دەچێتە ئیسرائیل و بڕیارە حەماس عیدان ئەلیکساندەر بارمتە ئیسرائیلی - ئەمریکییەکە ئازادبکات کە لە 7ـی مانگی 10ـی 2023 لە هێرشەکانیان بۆ سەر ئیسرائیل دەستگیرییان کرد.