ترەمپ سەردانی سعوودیە دەکات و چاوی لە وەبەرهێنانی زیاترە

ئاڤا نیوز

بڕیارە لەم هەفتەیەدا دۆناڵد ترەمپ، سەرۆکی ئەمریکا سەردانی سێ وڵاتی دەوڵەمەندی جیهان بکات،  بەمەبەستی نزیکبوونەوەی زیاتر و وەبەرهێنانی نوێ بۆ ئابووری ئەمریکا.

چیرۆکی سەرەکی: بڕیارە ڕۆژی سێشەممە 13ـی ئایار، ترەمپ بگاتە ڕیازی پایتەختی سعوودیە و لەگەڵ محەمەد بن سەلمان، شازادەی جێنشینی ئەو وڵاتە کۆببێتەوە، ڕۆژێک دواتریش بەشداری لە کۆبوونەوەی لووتکەی سەرکردەکانی کەنداو لەو شارە بکات.

زانیاریی بەدەستهاتوو: کارین یۆنگ، ئابووریناسی ئەمریکی دەڵێت:  ترەمپ دەیەوێت لەڕێگەی وڵاتانی کەنداوە وەبەرهێنان و پارەی زیاتر بۆ ئەمریکا بهێنێت، چونکە دەستەبەرکردنی وەبەرهێنانی نوێ لە ئەمریکا لە وڵاتانی کەنداو  یارمەتی ترەمپ دەدات بۆ ئەوەی کارنامەی خۆی بەدەستبهێنێت کە ئاماژەیە بۆ  بنەمای "ئەمریکا یەکەم".

بۆچی گرنگە: لەگەڵ گەڕانەوەی ترەمپ بۆ کۆشكی سپی، بڕیار وابوو یەکەم گەشتی خۆی بۆ دەرەوە بۆ سعوودیە ئەنجام بدات، بەڵام بەهۆی مردنی پاپا فرانسیس بەمەبەستی بەشداریکردن لە پرسەکەی سەردانی ڕۆمای کرد، هاوکات سعوودیە یەکەم وڵات بوو کە ترەمپ لە یەکەم خولی سەرۆکایەتیدا سەردانی کرد، ئەمەش پێچەوانەی پراکتیزە مۆدێرنەکەی سەرۆکەکانی ئەمریکا بوو کە لە بەریتانیا، کەنەدا یان مەکسیکەوە دەستیانپێدەکرد.