مەسرور بارزانی: بە پاڵپشتی کەرتی تایبەت هەلی کار بۆ گەنجان دەڕەخسێنین

ئاڤا نیوز

سەرۆکوەزیران مەسرور بارزانی کارگەی چیمەنتۆ و وێستگەی کارەبای دابین ـی لە بناری چیای سەفین لە پارێزگای هەولێر کردەوە و ئاماژەی بەوەدا، کە پەیوەندییەکانیان لەگەڵ دەرەوە باشتر دەکەن، بۆ ئەوەی کوردستان لە هەموو بوارەکاندا ببوژێنینەوە.

وێنە گەورەکە: حکومەتی هەرێمی كوردستان، لە چوارچێوەی کارنامەکەی لە بواری  ئابووریدا، بایەخێکی زۆر بە هەردوو کەرتی پیشەسازی و کشتوکاڵ دەدات، لەپاڵ پاڵپشتی بۆ کەرتی تایبەت جەخت لە ڕەخساندنی هەلی کار بۆ گەنجان کراوەتەوە.

لێدوانی فەرمی: سەرۆکوەزیران مەسرور بارزانی لەکاتی کردنەوەی کارگەی چیمەنتۆ و وێستگەی کارەبای دابین گوتارێکی پێشکەشکرد و گوتی:

٠ جێگای دڵخۆشییە توانا ناوخۆییەکان لەگەڵ هاوکاری دۆستەکان بەرهەمێکی ئاوا گەورەی هەبووە و ڕەچاوی هەموو ڕێنماییە ژینگەییەکان کراوە.

٠ بە پاڵپشتی کەرتی تایبەت هەلی کار بۆ گەنجانی وڵاتەکەمان دابین دەکەین.

٠ سیاسەتی حکومەتی هەرێمی کوردستان بۆ هەمەچەشنکردنی داهاتەکان ڕەوا بووە.

٠ پەیوەندییەکانمان لەگەڵ دەرەوە باشتر دەکەین، بۆ ئەوەی کوردستان لە هەموو بوارەکاندا ببوژێنینەوە.

٠ کارگەی چیمەنتۆی دابین توانای هەیە ڕۆژانە هەشت هەزار تۆن چیمەنتۆ بەرهەمبهێنێت.

ئەوەی پێویستە بیزانیت: کارگەی چیمەنتۆی دابین، لەسەر ڕوووبەری 212 دۆنم بە گوژمەی 280 ملیۆن دۆلار دروستکراوە، هەزار و 200 هەلی کار دەڕەخسێنێت، ڕۆژانە توانای بەرهەمهێنانی 8 هەزار تۆن و ساڵانە دوو ملیۆن و 100 هەزار تۆن چیمەنتۆی هەیە.