حەماس سەربازێکی ئەمریکی - ئیسرائیلی ئازاد دەکات

ئاڤا نیوز

بزووتنەوەی حەماس، ئیدان ئەلێکساندەر، سەربازی ئیسرائیلی - ئەمەریکی لە غەززە ئازاد دەکات و سەرۆکی ئەمریکا ستایشی  بڕیارەکەی حەماسی دەکات و بە "هەواڵێکی مێژوویی" ناوی دەبات.

چیرۆکی سەرەکی: ڕۆژی یەکشەممە 2025-05-11، بزووتنەوەی حەماس بڕیاری ئازادکردنی ئیدان ئەلێکساندەر سەربازی ئیسرائیلی - ئەمەریکی دا ، ئەمەش دوای ماوەیەکی کەم لە ڕاگەیاندنی وتووێژی ڕاستەوخۆی بەرپرسانی بزووتنەوەی حەماس لەگەڵ ئەمەریکا لە دەوحە، سەبارەت بە ئاگربەست و چوونە ناوەوەی یارمەتییەکان بۆ ناو غەززە.''

لێدوانە فەرمییەکان:

٠ سەرۆکی شاندی حەماس ڕایگەیاند "ئازادکردنی ئیدان ئەلێکساندەر، بەشێک دەبێت لەو هەنگاوانەی بۆ گەیشتن بە ئاگربەست و کردنەوەی دەروازەکان و ڕێگەدان بە چوونە ژوورەوەی هاوکاریی و فریاگوزاری بۆ هاووڵاتییان گیراونەتەبەر، جەختیشی لە ئامادەیی بزووتنەوەکە کردەوە بۆ دانوستانی چڕ و هەوڵی جددی  بۆ گەیشتن بە ڕێککەوتنی کۆتایی بۆ ڕاگرتنی شەڕ و ئاڵوگۆڕی دیل.

٠ دۆناڵد ترەمپ، سەرۆکی ئەمریکا رایگەیاند: ''سوپاسی هەموو لایەنەکان دەکەم کە بەشدارییان لەم هەوڵە مێژووییە کردووە و ئاماژەی نیازپاکییە، گوتیشی هیوادارین ئەمە یەکەم هەنگاو بێت کە پێویستە بۆ کۆتاییهێنان بەم ململانێیە."

لەلایەکی دیکەوە: نووسینگەی بنیامین نەتانیاهۆ، سەرۆک وەزیرانی ئیسرائیل ڕایگەیاند، ئاگاداری ئازادکردنی ئەو بارمتە ئەمەریکییەن، بەڵام ئازادکردنی لە هێرشەکانمان بۆ سەر حەماس ڕامان ناگرێت و هیچ پاداشتێکیشی نابێت.

زانیاریی زیاتر: ئەبو عوبەیدە، وتەبێژی بزووتنەوەی حەماس ڕایگەیاند، ڕۆژی دووشەممە، ئیدان ئەلیکساندەر، سەربازی ئیسرائیلی - ئەمەریکی ئازاد دەکەین.