کارمەندە هەمیشەییەکانی کۆمیسیۆن زەوییان پێدەدرێت

ئاڤا نیوز

فەرمانبەرانی كۆمیسیۆنی هەڵبژاردنەكانی عێراق كە لە نووسینگەکانی هەولێر و سلێمانی و دهۆك دەوام دەكەن، زەوییان پێدەدرێت و وەزارەتی شارەوانی ڕێنمایی تایبەت بە پڕکردنەوەی فۆڕمیان بۆ دەنێرێت.

چیرۆکی سەرەکی: سەرۆكایەتیی ئەنجوومەنی وەزیرانی هەرێمی کوردستان ڕۆژی 7-4-2025، نووسراوێکی ئاراستەی وەزارەتی شارەوانی کردووە بەمەبەستی دابینکردنی زەوی بۆ فەرمانبەرانی كۆمیسیۆنی باڵای سەربەخۆی هەڵبژاردنەكانی عێراق لە ئۆفیسەکانی هەرێمی کوردستان.

لێدوانی فەرمی: سەربەست مەولوود، سەرپەرشتیاری تیمی وردبینیی پرۆسەی دابەشکردنی زەوی له‌ وه‌زاره‌تی شاره‌وانی بە ئاڤای گوت: "ئەو ڕێنماییانەی لەسەر فەرمانبەرانی ئاسایی جێبەجێکراون بۆ فەرمانبەرانی کۆمیسیۆنیش هەمان ڕێنمایی دەبن، گرنگترینیان نابێت خزمەتیان لە 8 ساڵ کەمتر بێت، مەرجە فەرمانبەری هەمیشەیی بن و پێشووتر زەوییان وەرنەگرتبێت."

ئەوەی پێویستە بیزانیت: پێدانی زەوی بە فەرمانبەرانی کۆمیسیۆنی عێراق لەسەر ئەرکی حکومەتی هەرێمی کوردستان تەنیا فەرمانبەرانی نووسینگەکانی هەولێر و سلێمانی و دهۆک دەگرێتەوە کە ژمارەیان هەزار و 628 کەسە، دوای پڕکردنەوەی فۆڕمەکانیش لە وەزارەتی شارەوانی وردبینیان بۆ دەکرێت، دواتر بەگوێرەی کارتی زانیاری و شوێنی نیشتەجێبوونیان زەوییان پێدەدرێت.