وەزیرانی دارایی و بازرگانی وڵاتانی عەرەبی لە بەغدا کۆدەبنەوە

ئاڤا نیوز

 

لە چوارچێوەی ئامادەکارییەکان و پەسەندکردنی کارنامەی کۆبوونەوەی لووتکەی عەرەبی و لووتکەی گەشەپێدان، ئەمڕۆ وەزیرانی دارایی و بازرگانی وڵاتانی عەرەبی لە بەغدا کۆدەبنەوە.

وێنە گەورەکە: ڕۆژی 17ـی ئەم مانگە کارەکانی لووتکەی عەرەبی لە بەغدا دەستپێدەکات، بۆ لووتکەکەش پادشا و سەرۆکی هەر 22 دەوڵەتەکەی ئەندام لە کۆمکاری عەرەبی بانگهێشتکراون، لە هەمان کات و ڕۆژیشدا لووتکەی گەشەپێدانی ئابووریی و کۆمەڵایەتی لە بەغدا بەڕێوەدەچێت.

 

زانیاریی زیاتر: بەگوێرەی خشتەی ئامادەکارییەکان بۆ لووتکەی عەرەبی، ئەمڕۆ سێشەممە وەزیرانی دارایی و بازرگانی وڵاتانی عەرەبی کۆدەبنەوە، لە کۆبوونەوەکەدا پێکەوەگرێدانی ئابووری، ناوچەی ئازادی بازرگانی، پڕۆژەی کارەبا، گواستنەوە، ئاسایشی ئاو و خۆراک، زیرەکی دەستکرد و چەند پڕۆژەیەکی دیکە تاوتوێ دەکرێن و ڕاسپاردە لەبارەیانەوە دەخرێنەبەردەم سەرکردەکانی عەرەب.

گۆشەیەکی دیکەی دیمەنەکە: چاوەڕێ دەکرێت کۆی پرسەکانی پەیوەست بە گەشەپێدان و کۆمەڵایەتی، لە لووتکەی گەشەپێدانی ئابووریی و کۆمەڵایەتی بڕیاریان لەسەر بدرێت و بەناوی "ڕاگەیێنراوی بەغدا" بڵاوبکرێنەوە، دواتریش وڵاتانی عەرەبی ئەو بەرنامەیە لە سیاسەتی درێژخایەنی دەوڵەتەکانیاندا جێگەی دەکەنەوە و جێبەجێی دەکەن.