ترەمپ: باوەڕم بە قسەی حوسییەکان هەیە

ئاڤا نیوز

 

دۆناڵد ترەمپ، سەرۆکی ویلایەتە یەکگرتوەکانی ئەمریکا ڕایگەیاندووە، باوەڕی بە بەڵێنی چەکدارانی حووسییەکانی یەمەن هەیە کە باس لە وەستاندنی هێرشەکانیان دەکەن بۆ سەر کەشتییەکانی ئەمریکا.

 

وێنە گەورەکە: بە نێوەندگیری عومان حووسییەکانی یەمەن بەڵێنیان داوە چیتر هێرش بۆ سەر کەشتییە بازرگانییەکانی دەریای سوور ئەنجام نادەن و ئەمریکاش دەستبەجێ هێرشە ئاسمانییەکانی بۆ سەر ئەو گرووپە لە یەمەن ڕاگرتووە.

لێدوانی فەرمی: دۆناڵد ترەمپ، سەرۆکی ئەمریکا بە ڕۆژنامەنووسانی ڕایگەیاند: ''لە چەند ڕۆژی ڕابردوودا چەندین شت ڕوویانداوە، دۆخێکی وامان خوڵقاندووە کە حووسییەکان بۆ یەکەمجار بە تەواوی هێرشەکانیان وەستاندووە".

 

- ئاماژەی بەوەشکرد،  10  ساڵی ڕابردوو بۆ وڵاتانی ناوچەکە زۆر قورس بوو بەڵام ئێمە ئەو دۆخەمان ئارام کردووەتەوە و حووسییەکان بەڵێنیان پێداوین, کە چیتر هێرش بۆ سەر کەشتییە بازرگانییەکانمان و ئەمریکییەکان ئەنجام نادەن، کەس نەیتوانی ئەوە بکات ئێمە کردمان.

 

باکگراوند: ڕۆژی 15-3-2025، دۆناڵد ترەمپ، سەرۆکی ئەمریکا فەرمانی دەستپێکردنی ئۆپەراسیۆنی  سەربازیی دژی حووسییەکان دەرکرد و هەڕەشەی لە ناوبردنی تەواوی تواناکانی ئەو گرووپەی نزیک لە ئێرانی کرد و وەک بەشێک لە هەوڵەکانی واشنتن بۆ سنووردارکردنی هەڕەشەکانی گرووپەکە بۆ سەر کەشتییەکانی لە دەریای سوور.