لووتکەی عەرەبی شەقامەکانی بەغدا ئیفلیج دەکات

ئاڤا نیوز

بەهۆی نزیکبوونەوەی وادەی بەستنی لووتکەی عەرەبی لەبەغدا، ئەمڕۆ پردی دوو نهۆمی کەڕادە بەڕووی شۆفێراندا داخرا، بەهۆیەوە جموجۆڵی هاتووچۆ لەزۆربەی شەقامەکانی بەغدا پەکیکەوتووە.

وێنە گەورەکە:  17ـی ئەم مانگە لووتکەی وڵاتانی عەرەبی لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون.

زانیاریی بەدەستهاتوو: هەرچەندە فەرماندەیی ئۆپەراسیۆنەکانی بەغدا و بەڕێوەبەرایەتیی گشتیی هاتووچۆی عێراق تا ئێستا هۆکاری داخستنی ئەو پردەیان ئاشکرا نەکردووە، بەڵام هەندێک لەسەرچاوەکانی هەواڵ و میدیا عێراقییەکان بە بەشێک لەپلانی ئەمنی بۆ سەرخستنی کارەکانی لووتکەی عەرەبی دەزانن.

ئەوەی پێویستە بیزانیت: پردی دوو نهۆمی لە بەغدا، هەردوو ناوچەی کەڕادە و دۆرە بەیەکەوە دەبەستێتەوە کە بەدوو ناوچەی گەورەی بازرگانی و نیشتەجێبوونی بەغدا دادەنرێت، بەشێکی زۆری فەرمانگە حکومییەکان و بنکەی سەرەکی  پارتە سیاسییەکان دەکەوێتە دەورووبەری ئەو ناوچەیە.