زە ناشیۆناڵ: ئەحمەد شەرع بۆ بینینی ترەمپ سبەی چوارشەممە دەچێتە سعودییە

ئاڤا نیوز

ڕۆژنامەی "زە ناشیۆناڵ" بە گوێرەی چەند سەرچاوەیەک ئاشکرای کردووە کە ئەحمەد شەرع، سەرۆککۆماری سووریا سبەی چوارشەممە بەرەو سعودییە بەڕێدەکەوێت بۆ دیدار لەگەڵ دۆناڵد ترەمپ، سەرۆکی ئەمریکا لە پەراوێزی لووتکەی کەنداو-ئەمریکی.

چیرۆکی سەرەکی: سێشەممە 13-5-2025، دۆناڵد ترەمپ، سەرۆکی ئەمریکا لەدووەم خولی سەرۆکایەتییدا بۆ یەکەم سەردانی دەرەوەی وڵات هاوشێوەی خولی یەکەمی سعودییەی هەڵبژارد و بە یاوەری شاندێکی باڵای وڵاتەکەی گەیشتە سعودییە.

زانیاریی بەدەستهاتوو: سەرچاوەیەک لە وەزارەتی دەرەوەی سووریا کە قسەی بۆ ڕۆژنامەکە کردووە ئاماژە بۆ ئەوە دەکات، بەرپرسانی سعودییە پێشنیازی "دانیشتنێکی 45 خولەکی" نێوان ترامپ و شەرعیان کردووە.

زانیاریی زیاتر: ئەو دیپلۆماتکارە ئەوەشی گوتووە کە ترەمپ ڕەزامەندی نیشان داوە "کاتێک بۆ گوێگرتن" بە شەرع بدات، بەڵام تاوەکو ئێستا ویلایەتە یەکگرتووەکان پشتڕاستی کۆبوونەوەکەی نێوانیانی نەکردووەتەوە.

لەلایەکی دیکە: بەرپرسێکی دیکەی وەزارەتی دەرەوەی سووریا، بە هەمان ڕۆژنامەی ڕاگەیاندووە، سعودییە دەستپێشخەری کردووە لە ناوبژیوانی لە پەیوەندییەکانی نێوان ویلایەتە یەکگرتووەکان و سووریا و ڕایگەیاند: دەرئەنجامی کۆبوونەوەکەی نێوان هەردوو سەرکردە، ئەگەر بێت و ڕووبدات، "بەندە بە سعودییەکانەوە".

ئەوەی پێشبینی دەکرێت: سایتی ئەكسیۆس: پێشبینی دەكرێت دۆناڵد ترەمپ لە ڕیازی پایتەختی سعودییە، چاوی بكەوێت بە ئەحمەد شەرع.