ترەمپ: سزاکانی سەر سووریا هەڵدەگرم

ئاڤا نیوز

ترەمپ لە ڕیازەوە هەڵگرتنی سزاکانی سەر سووریا ڕادەگەیێنێت و دەڵێت، "دەرفەتێکی نوێ بەو وڵاتە دەدەین".

وێنە گەورەکە: لە میانی بەشداریکردنی لە کۆڕبەندی وەبەرهێنانی ئەمریکی-سعودی، دۆناڵد ترەمپ باسی لە سزاکانی سەر سووریای کرد.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، دوای تاووتوێکردنی لەگەڵ شازادەی جێنشینی سعوودیە، "بڕیارمدا سزاکانی سەر سووریا هەڵبگرم"، بۆ ئەوەی دەرفەتێکی نوێیان پێ بدرێت.

- "بڕیارە لەم چەند ڕۆژەدا وەزیری دەرەوەمان لەگەڵ هاوتا سوورییەکەی کۆدەبێتەوە و هەنگاوی یەکەممان ناوە بۆ ئاساییکردنەوەی پەیوەندییەکانمان لەگەڵ سووریا".

- سووریا شایەتحاڵی نەهامەتییەکی زۆر بووە، "حکومەتێکی نوێش هەیە کە هیوادارین لە گەیشتن بە سەقامگیری سەرکەوتوو بێت".

لەلایەکی دیکەوە: ئەسعەد شەیبانی، وەزیری دەرەوەی سووریا پێشوازی لە بڕیارەکەی ترەمپ کرد و وتی، "ئەم بڕیارە دەبێتە خاڵێکی وەرچەرخانی سەرەکی بۆ گەلی سووریا لەکاتێکدا دوای چەندین ساڵ لە شەڕی وێرانکەر  بەرەو داهاتوویەکی سەقامگیر و خۆبژێوی و ئاوادانکردنەوەی ڕاستەقینە دەڕۆین".

بەتەنیشت ئەم بابەتەوە: مەزڵووم عەبدی، فەرماندەی گشتی هێزەکانی سووریای دیموکرات (هەسەدە) سوپاسی بڕیارەکەی ترەمپی کرد و ڕایگەیاند، بڕیارەکە کاریگەری ئەرێنی لەسەر سووریا دەبێت و "هیواداراین سوود لەم هەنگاوە ببینرێت بۆ پاڵپشتیکردنی سەقامگیری و دووبارە بونیادنانەوەی سووریا بێت و هیوادارین ئەم بڕیارە داهاتوویەکی باشتر بۆ هەموو سوورییەکان مسۆگەر بکات". هەمیشە سووریا شایەنی باشترینە.