چاندنی گەنمەشامی لە هەرێمی کوردستان قەدەغە کرا

ئاڤا نیوز

 

بەڕێوەبەرایەتیی گشتیی كشتووكاڵی هەولێر داوا لە جووتیاران دەکات، بەهۆی کەمبوونەوەی ئاو ئەمساڵ گەنمەشامی نەچێنن. هۆشداریش دەدات، هەر جووتیارێک پابەندی بڕیارەکە نەبێت ڕووبەڕووی ڕێکاری یاسایی دەبێتەوە.

 

وێنە گەورەکە: بەڕێوەبەرایەتیی گشتیی كشتووكاڵی هەولێر داوا لە جووتیاران دەکات و هاوکات نووسراویش ئاراستەی بەڕێوەبەرایەتییەكانی دەکات، ئەمساڵ بەهیچ شێوەیەك گەنمەشامی نەچێنرێت، چونكە ئاوێكی زۆری دەوێت، ئەمساڵیش كەمبارانییە و زیانی زیاترە لە قازانج.

 

لێدوانی فەرمی: هێمن سەید موراد، بەڕێوەبەری گشتیی كشتوكاڵی هەولێر بە ئاڤای ڕاگەیاند، بەهۆی ئەوەی ئاوی سەرزەوی و ژێرزەوی كەمی كردووە، داوامان لە جووتیاران ئەوەیە كە ئەمساڵ گەنمەشامی نەچێنن.

بەڕێوەبەری گشتیی کشتوکاڵی هەولێر، هانی جووتیاران دەدات لەبری گەنمەشامی، "ئەمساڵ پەتاتە و تەماتە و خەیار بچێنن و قازانجی باشیش دەكەن".

 

کاریگەری و لێکەوتەکان:  بە گوتەی هێمن سەید موراد، "هەر جووتیارێك گەنمەشامی بچێنێت، بەهیچ شێوەیەك پشتگیریان ناكەین، كارەبایان پێنادەین و مۆڵەتی بیرلێدانیشیان پێنادەین، ئەمە لە عێراقیش بڕیاری بۆ دەرچووە، چونکە ئاوێکی زۆری دەوێت، لەڕووی ئابوورییشەوە ئاوەکە بمێنێت و لە گەنمەشامی سەرف نەکرێت باشترە".

 

ئەوەی پێویستە بیزانیت: ئەگەر جووتیاران پابەند نەبن، "ڕێکاری یاساییان بەرامبەر دەگیرێتەبەر".

زانیاریی زیاتر: وەرزی بەرهەمهێنانی گەنمەشامی دوای بەرهەمی گەنم دەستپێدەكات، واتا هەر چەند ڕۆژێكی دیكە، بۆیە داوایەكە ئێستا ئاراستەی جووتیاران دەكرێت، هاوکات داوا لە پارێزگا و ئیدارە سەربەخۆكان و هێزە ئەمنییەكانیش كراوە كە هاوكار بن بۆ ڕێگریكردن لە بەرهەمهێنانی گەنمەشامی.