ئەسعەد شەیبانی: ئامادەیین بۆ بوونیادنانی پەیوەندی لەگەڵ ئەمریکا

ئاڤا نیوز

وەزیری دەرەوەی سووریا پێشوازی لە لێدوانەکانی ئەمدواییەی دۆناڵد ترەمپ سەبارەت بە هەڵگرتنی سزاکانی سەر سووریا دەکات و ئامادەیی وڵاتەکەشی بۆ بوونیادنانی پەیوەندی لەگەڵ ویلایەتە یەکگرتووەکانی ئەمریکا دەردەبڕێت.

وێنە گەورەکە: لە میانی بەشداریکردنی لە کۆڕبەندی وەبەرهێنانی ئەمریکی-سعودی، دۆناڵد ترەمپ، سەرۆکی ئەمریکا باسی لە سزاکانی سەر سووریای کرد و ڕایگەیاند، "دوای تاووتوێکردنی لەگەڵ شازادەی جێنشینی سعوودیە، بڕیارمدا سزاکانی سەر سووریا هەڵبگرم".

لێدوانی فەرمی: ئەسعەد شەیبانی، وەزیری دەرەوەی سووریا، بە ماڵپەڕی فەرمی سووریای ڕاگەیاند: ئەم پێشهاتە خاڵێکی وەرچەرخانی گرنگە بۆ گەلی سووریا، لەکاتێکدا کە بەرەو داهاتوویەکی سەقامگیری، خۆبژێوی و بوونیادنانەوەی ڕاستەقینە دەڕۆین دوای چەندین ساڵ لە جەنگی وێرانکەر.

- زۆر بە ئەرێنی سەیری ئەم ڕاگەیاندنە دەکەین و ئامادەین پەیوەندییەک لەگەڵ ویلایەتە یەکگرتووەکان بوونیاد بنێین کە لەسەر بنەمای ڕێزی دووقۆڵی، متمانە و بەرژەوەندییە هاوبەشەکان بێت

- سەرۆک ترەمپ دەتوانێت ڕێککەوتنێکی ئاشتی مێژوویی و سەرکەوتنێکی ڕاستەقینە بۆ بەرژەوەندییەکانی ئەمریکا لە سووریا بەدەستبهێنێت، ئەو ئێستا زیاتری پێشکەش بە گەلی سووریا کردووە لەوانی پێش خۆی کە ڕێگەیان دا بە تاوانکارانی جەنگ هێڵە سوورەکان ببەزێنن و کۆمەڵکوژی نامرۆڤانە ئەنجام بدەن.

ئەوەی پێویستە بیزانیت: دۆناڵد ترەمپ ڕایگەیاند، "سزاکانی سەر سووریا هەڵدەگرین، بۆ ئەوەی دەرفەتێکی نوێیان پێ بدرێت. بڕیارە لەم چەند ڕۆژەدا وەزیری دەرەوەمان لەگەڵ هاوتا سوورییەکەی کۆببێتەوە و هەنگاوی یەکەممان ناوە بۆ ئاساییکردنەوەی پەیوەندییەکانمان لەگەڵ سووریا، سووریا شایەتحاڵی نەهامەتییەکی زۆر بووە، حکومەتێکی نوێش هەیە کە هیوادارین لە گەیشتن بە سەقامگیری سەرکەوتوو بێت".