حکومەتی عێراق: ژمارەیەکی گرنگ لە سەرکردە و پاشا و سەرۆکەکان دێنە بەغدا

ئاڤا نیوز

وتەبێژی حکومەتی عێراق ڕایدەگەیێنێت، "ژمارەیەکی گرنگ لە سەرکردە و پاشا و سەرۆکەکان ئاگاداریان کردووینەتەوە کە بۆ لووتکەی عەرەبی لە بەغدا، ئامادە دەبن".

وێنە گەورەکە: 17ـی ئەم مانگە لووتکەی وڵاتانی عەرەبی لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون، بەڵام بەشێکیان هەرزوو ڕایاناگەیاندووە کە لەبری خۆیان شاند دەنێرن.

لێدوانی فەرمی: باسم عەوادی، وتەبێژی فەرمی حکومەتی عێراق بە ئاژانسی فەرمی عێراقی ڕاگەیاند، بەستنی لووتکەی عەرەبی لە بەغدا نوێنەرایەتیی گەڕانەوەی ڕۆڵی میحوەری عێراق دەکات لە سیستەمی عەرەبیدا، ئاماژەی بەوەش کرد کە ژمارەیەکی گرنگ لە سەرکردە و پاشا و سەرۆکە عەرەبەکان بە فەرمی دڵنیاییان داوە لە ئامادەبوونیان لە لووتکەکەدا لە ڕێگەی ئاگادارکردنەوەکان کە ئاراستەی وەزارەتی دەرەوە و سەرۆکایەتی وەزیران کراون.

ئەوەی پێشبینی دەکرێت: بە گوتەی عەوادی، ئەم لووتکەیە یەکێک لە پێگەیشتووترین لووتکە عەرەبییەکان دەبێت لە ڕووی نوێنەرایەتی و جۆری ئامادەبووان، ڕوونی کردەوە کە بەستنی لە بەغدا هەڵگری ماناگەلێکی گرنگە، لەوانە چەسپاندنی سەقامگیری سیاسی و ئەمنی، دەرخستنی پێگەیشتوویی دەوڵەتی عێراق و توانای لە میوانداریکردنی سەرکردە و پاشا عەرەبەکان و گفتوگۆکردن لەسەر پرسە سەرەکییەکانی عەرەب.