ئاڤا بەدواداچوون بۆ تاپۆکردنی خانووەکانی حکومەت لەسەر فەرمانبەران دەكات

ئاڤا نیوز

 

حكومەتی هەرێمی كوردستان ساڵانێكە سەدان خانووی لە شار و شارۆچكەكانی هەرێمی كوردستان بە فەرمانبەرانی وەزارەت و فەرمانگە جۆراوجۆرەكان داوە، ئێستا فەرمانبەرەكان داوای بەناوكردنیان دەكەن، بەڵام وەزارەتەكان ئامادە نین ئەم كارە بكەن، سەرەڕای ئەوەی ئەنجوومەنی وەزیران دوو جار بڕیاری بۆ دەرکردووە.

 

چیرۆكی سەرەكی: نۆ خانەوادە لە سۆران كە لەنێو خانووی وەزارەتی تەندروستیدا دەژین و ماوەی زیاتر لە 30 ساڵە پێیان دراوە و لەو ماوەیەدا دەستكاریی خانووەكانیان كردووە و بڕێك پارەیان لێ خەرج كردووە، داوای بەناوكردنی خانووەكانیان دەكەن، بەڵام تاوەكو ئێستا وەڵامی ئەرێنییان نەدراوەتە، ئەمە سەرەڕای بڕیاری ئەنجوومەنی وەزیران و وەزارەتەكانی ناوخۆ و دارایی، بەپێی بەدواداچوونی ئاڤا میدیا ئەم گرفتە لە چەند ناوچەیەكی دیكەی هەرێمی كوردستان زۆرینەی فەرمانگە و وەزارەتەكان هەمان گرفتیان هەیە و سەدان فەرمانبەر چاوەڕوانی بڕیارێکی دڵخۆشکەرن.

بڕیاری فەرمی: حکومەتی هەرێمی کوردستان بە دوو بڕیار لە ساڵانی 1998 و 2013 بڕیاری داوە بە تاپۆكردنی خانووە حکومییەکان بە ناوی نیشتەجێبووانیان، ساڵی ڕابردوو بە دیاریکراوی لە بەرواری 8-1-2024، سەرۆکایەتیی ئەنجوومەنی وەزیران نووسراوێکی ئاراستەی وەزارەتی دارایی و ئابووریی کردووە، بۆ ئەوەی خانووەکانیان بەناو بکرێن لە ماوەی سێ مانگدا، هەروەها وەزارەتی داراییش لە 29-1-2024  بە واژووی ئاوات شێخ جەناب، نووسراوێکی بۆ گشت وەزارەت و دەستەکانی نەبەستراو بە وەزارەت کردووە، داتای موڵکەکانیان بنێرن ئەوانەی فەرمانبەران تیایاندا نیشتەجێن بۆ ئەوەی هەر مامەڵەیەك مابێت کاری پێویستی لەسەر بکەن.

 

قووڵتر: بەپێی بەدواداچوونی ئاڤا میدیا و گوتەی ئەو كەسانەی كەلەنێو خانووی حكومیدان، وێڕای چەند بڕیاری فەرمی بەڵام وەزارەت و فەرمانگەكان تاوەكوو ئێستا ئامادە نین خانووەكان بەناوی ئەو كەسانەوە بكەن.

 

لەلایەكی دیكەوە: یەكێك لەو فەرمانبەرانەی سۆران كە ئەم كێشەیەی هەیە بە ئاڤا میدیای ڕاگەیاند كە چەند خانوویێك بە ڕێگای جۆراوجۆر بە ناوی فەرمانبەرەكان كراون بەڵام وەزارەتی تەندروستی ئامادە نییە شەش خانووەكەی دیكە بە ناوی فەرمانبەرەكانیەوە بكات، ئەمەش جیاكارییەكی ڕوون و ئاشكرای وەزارەتەكەیە لەنێوان خاوەنی خانووەكان.

لێدوانی فەرمی: د.سامان بەرزنجی، وەزیری تەندروستیی بە ئاڤا نیوزی ڕاگەیاند: "ئەو خانووانە موڵکی من نین  و هی حکومەتن، من ناتوانم بەناویان بکەم و لە دەسەڵاتی ئێمەدا نییە، بەڵام تاوەکو فەرمانبەر بن هەر لەناو خانووەکان سەبن و لێیان وەرناگیرێتەوە. 

لە وەڵامی ئەو پرسیارەش ئایا جیاکاری لەنێوان فەرمانبەران کراوە؟ وەزیری تەندروستی گوتی: "تەحەدا دەکەم لەوەتەی بوومەتە وەزیر یەک خانوو و موڵک بە ناوی هیچ فەرمانبەرێک نەکراوە".