حکومەتی عێراق بە فەرمی پرسی ئامادەبوون و نەبوونی ئەحمەد شەرعی یەکلا کردەوە

ئاڤا نیوز

وتەبێژی حکومەتی عێراق ڕایدەگەیێنێت، ئەحمەد شەرع، سەرۆککۆماری سووریا بە فەرمی داوای لێبوردنی کردووە کە ئامادەی لووتکەی عەرەبی لە بەغدا نابێت.

وێنە گەورەکە: 17ـی ئەم مانگە لووتکەی وڵاتانی عەرەبی لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون. بەڵام بەشێکیان هەرزوو ڕایاناگەیاندووە کە لەبری خۆیان شاند دەنێرن.

لێدوانی فەرمی: باسم عەوادی، وتەبێژی فەرمی حکومەتی عێراق لە میانی دیدارێکی تەلەڤزیۆنی لەگەڵ ئاژانسی فەرمی عێراق ڕاگەیاند، "ئێمە بەرژەوەندی و پەیوەندی گەورەمان لەگەڵ سووریا هەیە و نابێت بایکۆتی بکەین بەو بیانووەی کە شەرع پێش چەند ساڵێک لە بارودۆخێکی تایبەتدا بووە. ئەگەر بمانەوێت بەم شێوەیە سەیری شتەکان بکەین، ئەوا زۆرێک لە سەرکردە عێراقییەکان چەکدار بوون و گرووپیان هەبووە. بەڵام واقیع دەڵێت پشتگیرییەکی شاراوە بۆ شەرع هەیە لەلایەن وڵاتانی جیهانەوە، سەردانی زۆربەی پایتەختەکانی کردووە و زۆربەی سەرۆکەکان پێشوازییان لێکردووە".

- ئەحمەد شەرع لە میانی کۆبوونەوەی دەوحە بە ئامادەبوونی شا تەمیم و سەرۆکوەزیران داوای لێبوردنی کرد کە لە لووتکەی بەغدا ئامادە نابێت و "ئاگاداری کردینەوە کە لە بری خۆی وەزیری دەرەوە دەنێرێت".

زانیاریی زیاتر: بە وتەی باسم عەوادی، سوودانی پێی ڕاگەیاند سەرباری ئەوەی ئامادە نابێت، بەڵام بانگهێشتنامەی فەرمی بۆ دەنێرێت و لە عێراقدا پێشوازیی لێدەکرێت. ئەمە دوایین پەیوەندی بوو لەگەڵ شەرع و ئەوەی کە هەندێک ڕۆژنامەی کەنداو بڵاویان کردەوە لەبارەی پەیوەندی تەلەفۆنی، دوورە لە ڕاستییەوە.

ئەوەی پێویستە بیزانیت: ڕۆژنامەی عەینی ئیماراتی لەسەر زاری سەرچاوەیەکی ئاگاداری عێراقی ڕایگەیاندبوو، ئەحمەد شەرع لەسەر هەڵوێستی خۆی سوورە بۆ ئەوەی نەیەتە عێراق بۆ بەشداریکردن لە لووتکەی بەغدا و دەشڵێت: سەرۆکوەزیرانی عێراق پەیوەندیی تەلەفۆنی لەگەڵ ئەحمەد شەرع کردووە تاوەکو لە بڕیارەکەی پاشگەز ببێتەوە و بەشداری لووتکەکە بکات.