مالیکی: بەڕێوەچوونی لووتکەی عەرەبی لە بەغدا بەڵگەیە لەسەر پابەندبوونی عێراق بە ئەرکە هەرێمییەکانی

ئاڤا نیوز

سەرۆکی هاوپەیمانی دەوڵەتی یاسا ڕایدەگەیێنێت، بەستنی لوتکەی عەرەبی لە بەغدا بەڵگەیە لەسەر پابەندبوونی عێراق بە ڕۆڵی خۆی و پابەندبوونی بەو ئەرکانەی کە لەسەر شانیەتی.

وێنە گەورەکە: 17ـی ئەم مانگە لووتکەی وڵاتانی عەرەبی لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون.

لێدوانی ڕۆژنامەوانی: نووری مالیکی، سەرۆکی هاوپەیمانی دەوڵەتی یاسا بەبۆنەی بەستنی لووتکەی عەرەبی لە بەغدا گوتەیەکی پێشکەش کرد و لە بەشێکی قسەکانی ڕایگەیاند، بەستنی لووتکەی عەرەبی لە بەغدا بۆ جارێکی دیکە دەیسەلمێنێت کە عێراق هاوبەشێکی ڕاستەقینە و ڕەسەنە لەگەڵ سەرکردە عەرەبەکان بۆ ڕووبەڕووبوونەوەی ئاستەنگەکان.

- ئەو ئاستەنگانەی کە ناوچەکە ڕووبەڕووی دەبێتەوە، پێویستی بە لووتکەیەکی لەم جۆرەیە کە تێیدا سەرکردە عەرەبەکان لە نیشتمانی دووەمیان (عێراق) کۆدەبنەوە بۆ ڕووبەڕووبوونەوەی پەرەسەندن و ئاستەنگەکان، جەختی لەوە کردەوە کە میوانداریکردنی عێراق بۆ لووتکەی عەرەبی زیاتر لە جارێک دەیسەلمێنێت کە عێراق دەیەوێت بەشدار بێت لە چارەسەرکردنی کاروباری نەتەوەیی عەرەب و کارلێککردن لەگەڵیدا.

لەلایەکی دیکەوە: سەرۆکی هاوپەیمانی دەوڵەتی یاسا هیوای خواست وڵاتە عەرەبییە بەشداربووەکان لە لووتکەکەدا یەکگرتوو بن بۆ ڕووبەڕووبوونەوەی ئاستەنگەکان دوور لە کێشە و ناکۆکییەکان، گوتیشی: هیوادارین برا سەرکردە عەرەبەکان گرنگی بەو داواکارییانە بدەن کە لە لووتکەی عەرەبیدا پێشکەش دەکرێن.