مەسرور بارزانی لەبارەی کارەبای 24 کاتژمێری پەیامێک ئاراستەی هاووڵاتیان دەکات

ئاڤا نیوز

سەرۆكوەزیران مەسرور بارزانی پرۆژەی ڕووناکی بە یەكێك لە دەستكەوتە گرنگەكانی حكومەت دادەنێت و داوا لە هاووڵاتییان دەکات بە شێوەیەکی بەرپرسیارانە و بە پێی پێویستیی خۆیان کارەبا بە کاربهێنن و بەفیڕۆی نەدەن.

چیرۆکی سەرەکی: ئەمڕۆ چوارشەممە 14ـی ئایاری 2025، بە سەرپەرشتيی سەرۆکوەزیران مەسرور بارزانی، ئەنجوومەنی وەزیرانی هەرێمی کوردستان کۆبووەوە و لەمیانەدا ڕەشنووسی ئەنجوومەنی وەزیران سەبارەت بە پڕۆژەی ڕووناكی و وردەكارییەكانی خرایەڕوو بە مەبەستی گفتوگۆ و بڕیاردان، لە دوای گفتوگۆ و ڕاگۆڕینەوە و وەڵامدانەوەی پرسیارەکانی ئەندامانی ئەنجوومەنی وەزیران، پڕۆژە بڕیارەکە بە کۆی دەنگ پەسەند كرا.

لێدوانی فەرمی: سەرۆكوەزیران مەسرور بارزانی ڕایگەیاند:

٠ پڕۆژەی ڕووناكی بڕگەیەکی پەسەندکراوی كارنامەی کابینەی نۆیەمی حکومەتی هەرێمی کوردستانە کە لەلایەن پەرلەمانی کوردستانەوە لە مانگی تەمووزی 2019 پەسەندکرا و لەسەر بنەمای ئەو بەرنامەیە متمانە بە کابینەکە درا.

٠ ئەم پڕۆژەیە یەکێکە لە دەستكەوتە گرنگەکانی حکومەتی هەرێمی کوردستان و داوا و خواستی چەندین ساڵەی هاووڵاتیانی هەرێمی کوردستان بووە و مافێکی ڕەوا و سەرەتایی هاونیشتمانیانیش بوو کە بکرێتە ئەرکی لە پێشینەی ئەم کابینەیە بۆ ڕێکخستنەوە و ڕیفۆرمیی جیددی لە كارەبادا.

٠ دابینکردنی کارەبای 24 کاتژمێری، پڕۆژەیەکی نیشتیمانیيە کە خاوەندارێتی بۆ وەزارەتی کارەبایە و بە هێزی کاری خۆماڵی کەرتی گشتیی جێبەجێ دەکرێت و چەندین قازانج و سوودی گشتیی هەیە لە ڕووی ژینگەیی و تەندروستی و هەروەها خەرجییەکەشی بۆ زۆرینەی خەڵک کەمترە لەو پارەیەی کە هاووڵاتییان بە موەلیدە و پارەی کارەبای نیشتمانی پێکەوە، دەیدەن.

لەلایەكی دیكەوە: هەر لەمیانەی كۆبوونەوەكەدا سەرۆکوەزیران داواشی لە هاووڵاتیان کرد کە بە شێوەیەکی بەرپرسیارانە و بە پێی پێویستیی خۆیان کارەبا بە کاربهێنن و بەفیڕۆی نەدەن، بەو پێیەی بڕی بەکارهێنانی کارەبا، لێرە بە دواوە لە ژێر کۆنتڕۆڵی هاووڵاتییان دەبێت و بە پێی بەکارهێنان پارە دەدەن.

قووڵتر: ئەنجوومەنی وەزیران،وەزارەتی کارەبای ڕاسپارد بۆ دەرکردنی ڕێنمایی پێویست بۆ ئاسانکاری جێبەجێکردنی بڕیارەکە کە هەر بەگوێرەی بڕیارەکە، لیژنەیەکی باڵا لە سەرۆکایەتیی ئەنجومەنی وەزیرانەوە بە سەرپەرشتی سەرۆکوەزیران و بەشداریی جێگری سەرۆکوەزیران و وەزیرە پەیوەندیدارەکان پێکهات بۆ بەدوادچوون و هەڵسانگاندنی بەرەوپێشچوونەکانی پڕۆژەکە و سەرخستنی بە ئاراستەی خزمەتکردنی هاووڵاتییان و ڕەچاوکردنی بارودۆخیان بە تایبەتیش کەمدەرامەتان.