ئێران: ترەمپ سیاسەتی فریودان و چەواشەکاری پەیڕەو دەکات

ئاڤا نیوز

وەزیری دەرەوەی ئێران بە تووندی وەڵامی لێدوانەکانی دۆناڵد ترەمپ دەداتەوە و بە بەربەستی گەورەی بەردەم پێشکەوتنی ئێران ناوزەندی دەکات.

وێنە گەورەکە: سەرەڕای کۆبوونەوە و دانوستاندنی نێوان ئێران و ئەمریکا لەسەر بەرنامەی ئەتۆمی ئێران و پەیوەندی نێوان هەردوو وڵات، لێدوانەکانی دۆناڵد ترەمپ، سەرۆکی ئەمریکا بە تۆمەتبارکردنی ئێران بۆ پشتگیری تیرۆر و تێکدانی سەقامگیری ڕۆژهەڵاتی ناوڕاست، بەرپرسانی تاران توڕە دەکات و عەباس عێراقچی، وەزیری دەرەوەی ئێران بە تووندی وەڵامی دۆناڵد ترەمپ، دەداتەوە.

لێدوانی فەرمی: عەباس عێراقچی، وەزیری دەرەوەی ئێران لە دوای کۆبوونەوەی ئەمڕۆی کابینەی حکومەت بە میدیاکانی ڕاگەیاند: ئەمریکا و ترەمپ سیاسەتی چەواشەکاری و فریودان پەیڕەو دەکەن، لە کاتێکدا چاوپۆشی لە تاوانەكانی ئیسرائیل دەكات کە بەرپرسە لە ئەنجامدانی کۆمەڵکوژی، هەوڵدەدات ئێران وەك هەڕەشەیەك نیشان بدات و بە پشتیوانی تیرۆر تۆمەتباری دەکات، ئەم سیاسەتی شاردنەوەی ڕاستی و دەستوەردان لە کاروباری دەوڵەتان سەرکەوتوو نابێت و دەبێت ڕابگیرێت.

زانیاریی زیاتر: عەباس عێراقچی، وەزیری دەرەوەی ئێران ئەمریکای تۆمەتبار کرد بە دروستکردنی بەربەست لە بەردەم پێشکەوتنی ئێران و گوتی: سزا و فشارە بەردەوامەكانی ئەمریكا بوونەتە هۆی دروستکردنی بەربەست لە ڕێگەی پێشكەوتنی ئێران و دۆخێکی ناجێگیری بۆ ئابوری ئێران هێناوەتە کایەوە.

ئەوەی پێویستە بیزانیت: ئەمڕۆ لە لووتکەی وڵاتانی کەنداو دۆناڵد ترەمپ، سەرۆکی ئەمریکا ئێرانی بە ناردنی پشتیوانی بۆ گروپە تیرۆرستیەکان تۆمەتبار کرد و بە هەڕەشەی گەورە بۆ سەر ئاسایشی ڕۆژهەڵاتی ناوەڕاست ناوزەندی کرد و گوتی: بە شکستهێنانی دانوستاندنەکان، ئێران شکست دەهێنێت.