شەرع: ترەمپ بڕیارێکی بوێرانەی بۆ لابردنی گەمارۆی ئابووری سەر سووریا دەرکرد

ئاڤا نیوز

لەوتارێکدا کە بە بۆنەی هەڵگرتنی گەمارۆ ئابوورییەکانی ئەمریکا بۆ سەر وڵاتەکەی پێشکەشی کرد، ئەحمەد شەرع، سەرۆکی سووریا بڕیارەکەی ترەمپ و هەڵوێستی سعوودیە و تورکیای بەرز نرخاند.

چیرۆکی سەرەکی: ڕۆژی 2025-05-13، سەرۆکی ئەمریکا لە سعوودیەوە ئاشکرایکرد کە سزاکانی سەر سووریا هەڵدەگرێت و دەرفەتێک بۆ ئاوەدانکردنەوەی وڵاتەکە بە سەرکردایەتی نوێ دیمەشق دەدات.

وتاری فەرمی: لەوتارەکەیدا ئەحمەد شەرع، سەرۆککۆماری سووریا، وێڕای پیرۆزبایی لەخەڵکی سووریا بڕیارەکەی ترەمپ و هەڵوێستی سعوودیە و تورکیای سەبارەت بە هەڵگرتنی گەمارۆی ئابووری سەر وڵاتەکەی بەرز نرخاند و گوتی:

٠ ترەمپ بڕیارێکی بوێرانە و بەهێزی بۆ لابردنی گەمارۆی ئابووری سەر سووریا دەرکرد.

٠ شەش مانگ لەمەوبەر لەگەڵ محەممەد بن سەلمان شازادەی جێنشینی سعوودیە کۆبوومەوە و بەڵێنیدا هەوڵی هەڵگرتنی سزاکانی سەر سووریا بدات ، ئەردۆغانیش هەمان هەڵوێستی هەبوو و بەڵێنەکەیان بەدیهێنا.

٠ دەستخۆشی لەهەڵوێستی وڵاتانی عەرەبی بەتایبەتی سعوودیە و قەتەر و ئیمارات و هەروەها تورکیا و فەرەنسا لە پشتگیری وڵاتەکەماندا دەکەین.

٠ سووریا دەرفەتی ئابووری لەگەڵ جیهاندا دەکاتەوە و پێشوازی لە وەبەرهێنەرانی عەرەبی و تورکی دەکات.

باکگراوند: ئەمڕۆ چوارشەممە 2025-5-14، لە ڕیازی پایتەختی سعوودیە، هەریەک لە دۆناڵد ترەمپ، سەرۆکی ئەمریکا و ئەحمەد شەرع، سەرۆککۆماری سووریا، بە ئامادەبوونی محەممەد بن سەلمان کۆبوونەوە، لە کۆبوونەوەکەدا جەخت لەسەر گرنگی هەڵگرتنی سزا سەپێنراوەکانی سەر سووریا کرایەوە.