سبەی یەکەم کاروانی حەجخوازانی کوردستان بەرەو سعوودیە بەڕێدەکەون

ئاڤا نیوز

سبەی یەکەم کاروانی حەجخوازان لە سلێمانییەوە بەرەو سعوودیە بەڕێدەکەون، نزیکەی 700 حاجی لە دوو پارێزگا و دوو ئیدارەی سەربەخۆ گەشت دەکەن.

وێنە گەورەکە: ئەمساڵ لە هەرێمی کوردستان پێنج هەزار و 190 حەجخواز بەشداری لە فەریزەی حەج دەکەن، بە هەردوو ڕێگای وشکانی و ئاسمانی بەچەند کاروانێک گەشتی سعوودیە دەکەن، کە 12 ڕۆژ دەخایەنێت.

لێدوانی فەرمی: کاروان ستوونی، گوتەبێژی بەڕێوەبەڕایەتی حەج و عومرەی کوردستان بە ئاڤای گوت، "سبەی هەینی 696 حەجخواز لە سلێمانی، هەڵەبجە، ئیدارە سەربەخۆکانی ڕاپەڕین و گەرمیان لە ڕێگەی وشکانی یەکەم گەشتی سعوودیە دەکەن، ڕۆژی دواتر واتا شەممە دووەم و کۆتا کاروانی حەجخوازانی هەولێر، سلێمانی، دهۆک، سۆران و زاخۆ بەڕێدەکەون."

زانیاریی زیاتر: یەکەم گەشت بە ڕێگەی ئاسمانی ڕۆژی 19ـی ئەم مانگە دەکرێت و تاوەکو 28ـی مانگ بەردەوام دەبێت، سێ هەزار و 491 حەجخواز لەڕێگەی هەردوو فرۆکەخانەی نێودەوڵەتیی هەولێر و سلێمانی بەرەو سعوودیە بەرێدەکەون.