ئەحمەد شەرع: ڕێگە بە دابەشبوونی سووریا نادەین

ئاڤا نیوز

 

ئەحمەد شەرع، سەرۆککۆماری سووریا پێشوازی لە بڕیارەکەی ترەمپ بۆ هەڵگرتنی سزاکانی سەر سووریا دەکات و دەڵێت، سووریا دەچێتە نێو قۆناغێکی نوێ. شەرع دەشڵێت، "ڕێگە نادەین سووریا دابەش بێت".

 

وێنە گەورەکە: لە چوارچێوەی سەردانەکەی بۆ ڕۆژهەڵاتی ناوەراست، ڕۆژی چوارشەممە ڕێککەوتی 14ـی 5ـی 2025 دۆناڵد ترەمپ، سەرۆکی ئەمریکا لەگەڵ ئەحمەد شەرع، سەرۆکی کاتیی سووریا بە ئامادەبوونی محەممەد بن سەلمان، شازادەی جێنشینی سعودییە لە ڕیاز کۆبوونەوە، هاوکات لە کۆبوونەوەکەدا ڕەجەب تەیب ئەردۆغان، سەرۆککۆماری تورکیا بە ڤیدیۆ و لەڕێگەی ئۆنلاینەوە بەشداری کرد. ئەم کۆبوونەوەیە دوای یەک ڕۆژ دێت لە بڕیاری ترەمپ بۆ هەڵوەشاندنەوەی سزاکانی سەر سووریا.

 

لێدوانی فەرمی: ئەحمەد شەرع، سەرۆککۆماری کاتیی سووریا لەبارەی هەڵگرتنی سزاکانی سەر وڵاتەکەی ڕایگەیاند، پێشوازی لە بڕیارەکەی دۆناڵد ترەمپ، سەرۆکی ئەمریکا دەکەین، بڕیارێکی مێژوویی و بوێرانە بوو.

 

سەرۆککۆماری سووریا دەشڵێت، "ڕێگەنادەین سووریا دابەش ببێت و چیتر سووریا نابێتە گۆڕەپانی دابەشکردنی دەسەڵات، سووریا دەبێت ببێتە "وڵاتێکی هەلی کار و خۆشگوزەران".

 

لەلایەکی دیکە: ستیڤ وتیکۆف، نێردەی ترەمپ بۆ ڕۆژهەڵاتی ناوەڕاست دەڵێت، لە سووریا سەرکەوتن بەدەست دەهێنین.