د. دیندار زێباری: هەڵمەتی بەرەنگاربوونەوەی بازرگانیكردن بە مرۆڤمان دەستپێكردووە

ئاڤا نیوز

ڕێکخەری ڕاسپاردە نێودەوڵەتییەکان لە حكومەتی هەرێمی كوردستان، لەمیانی گفتوگۆكانی ڕاپۆرتی خولی پێنجەم و شەشەمی ڕێككەوتننامەی مافەكانی منداڵ كە لە شاری جنێڤ لە سویسرا بەڕێوەدەچێت، وتارێكی پێشكەش كرد و ڕایگەیاند، هەرێمی كوردستان هەنگاوی گەورەی لە پاراستنی مافەكانی منداڵ هاویشتووە و ئەو منداڵ و هەرزەكارانەی تەمەنیان خوار 18 ساڵە و بوونەتە ئەندامی گرووپە توندڕەوەكان، وەك قوربانی مامەڵەیان لەگەڵدا دەكرێت نەوەك تۆمەتبار.

چیرۆكی سەرەكی: ڕۆژانی 13 تاوەكو 18ـی ئایاری 2025، لەبارەگای نەتەوە یەكگرتووەكان لە جنێڤ، كۆبوونەوەكانی گفتوگۆكردنی ڕاپۆرتی خولی پێنجەم و شەشەم تایبەت بە ڕێككەوتننامەی مافەكانی منداڵ ئەنجام دەدرێن، شاندێكی حكومەتی هەرێمی كوردستان لەچوارچێوەی شاندێكی حكومەتی عێراق، لەو گفتوگۆیانە بەشدار دەبێت.

لێدوانی فەرمی: د. دیندار زێباری، ڕێکخەری ڕاسپاردە نێودەوڵەتییەکان ڕاپۆرتی ساڵانەی ڕەوشی مافی مرۆڤی لە هەرێمی كوردستان پەیوەست بە جێبەجێكردنی ڕاسپاردەكانی نەتەوە یەكگرتووەكان خوێندەوە و ڕایگەیاند، لە نیسانی 2023ـەوە، ئەنجوومەنی وەزیرانی هەرێمی كوردستان، 'سیاسەتی پاراستنی منداڵ'ـی پەسەند کرد کە ئامانجی پاراستنی منداڵانە لە هەموو جۆرەکانی توندوتیژی، دەستدرێژی و پشتگوێخستن. لیژنەیەک پێکهێنراوە بۆ پەسەندکردنی بودجەی پێویست، سەرباری دامەزراندنی ئەنجوومەنی باڵای پاراستنی مافەکانی منداڵ بە بەشداریی 10 وەزارەتی پەیوەندیدار.

- لەسەر ئاستی دادوەریی تایبەت بە نەوجەوانان، تەمەنی بەرپرسیارێتیی تاوانکاری بۆ 11 ساڵ بەرزکراوەتەوە و جێبەجێکردنی سزای لەسێدارەدان بۆ منداڵان قەدەغەکراوە. هەروەها لیژنەکانی دادگاکانی نەوجەوانان کارا کراونەتەوە و توێژەری کۆمەڵایەتی و دەروونی دابینکراون، سەرباری کاراکردنەوەی نووسینگەکانی لێکۆڵینەوە لە کەسایەتی.

- سەبارەت بەو کەسانەی خوار 18 ساڵین و پەیوەندییان بە گرووپە چەکدارەکانەوە هەبووە، وەک قوربانی مامەڵەیان لەگەڵ دەکرێت.

- وەزارەتی کاروباری شەهیدان و ئەنفالکراوان لیستێکی ئامادەکردووە کە زیاتر لە (100) منداڵی ونبووی هەڵەبجەی لەخۆگرتووە لە ساڵی 1988 بە مەبەستی ئاشکرا کردنی چارەنووسیان.

- بۆ بەرەنگاربوونەوەی بازرگانیکردن بە مرۆڤەوە، هەڵمەتێکی نیشتمانی دەستیپێکردووە، سەردانی (223) کۆمپانیای هاوردەكردن و كارپێكردنی كرێكاری بیانی كراوە، ڕەوانەکردنی (15) کەیس بۆ دادگا، دەستگیرکردنی (79) کەس و دەرکردنی حوکم بۆ (12)ـیان لەخۆگرت.