پارێزگاری دهۆک: داوا لە پەکەکە دەکەین پارێزگاکەمان چۆڵ بکات

ئاڤا نیوز

پارێزگاری دهۆك ڕایدەگەیەنێت، بەهۆی ململانێی چەكداریی دەیان ساڵەی نێوان پەكەكە و سوپای توركیا، دەیان گوندی پارێزگای دهۆك چۆڵ كراون، بەمەبەستی گەڕاندنەوەی گوندنشینان بۆ زێدی خۆیان، "داوا لە چەكدارانی پەكەكە دەكەین ئەو ناوچانە چۆڵ بكەن".

وێنە گەورەكە: پەكەكە لەماوەی 42 ساڵدا، دەیان بنكە و بارەگای سەربازی لە ناوچە سنوورییەكانی هەرێمی كوردستان دامەزراندووە، بەشی زۆری ئەو بنكە و بارەگایانەش كەوتوونەتە پارێزگای دهۆك، دوای بڕیاری كۆنگرەی پەكەكە بە خۆهەڵوەشاندنەوە و چەكدانان، داوا دەكرێت پەكەكە سەرجەم ئەو شوێنانە چۆڵ بكات كە بوونەتە بازنەی جموجۆڵە چەكدارییەكانی و بەهۆیەوە لەلایەن تۆپخانە و فرۆكە جەنگییەكانی توركیا بەردەوام بە ئامانج دەگیران.

لێدوانی فەرمی: د. عەلی تەتەر، پارێزگاری دهۆك لە كۆنفرانسێكی ڕۆژنامەوانیدا ڕایگەیاند، بەهۆی شەڕ و ململانێی چەکداریی دەیان ساڵەی نێوان پەکەکە و سوپای تورکیا، پارێزگای دهۆک زۆرترین زیانی بەركەوتووە و نزیكەی 30%ـی گوندەكانی پارێزگاكە بەهۆی بوونی بنكە و بارەگا سەربازییەكانی پەكەكە و بەئامانجگرتنیان لەلایەن تۆپخانە و فڕۆكە جەنگییەكانی توركیاوە، وێران كراون و بەتەواوی چۆڵ كراون.

بابەتە ستراتیژییەكە: پارێزگاری دهۆك دووپاتی كردەوە، "هۆكاری سەرەكیی نەگەڕانەوەی دانیشتووان بۆ ناوچەكانیان، سیاسەتی پەكەكەیە و داوا لە چەكدارانی پەكەكە دەكەین، ئەو گوند و شاخانەی كە ئێستا تییدا جێگیرن، چۆڵی بكەن".

زانیاریی زیاتر: حکومەتی هەرێمی کوردستان، لە ئێستاوە دەستیکردووە بە جێبەجێکردنی ژمارەیەك پرۆژەی ئاوەدانکردنەوە لەو ناوچانەی كە زیانیان بەرکەوتووە، لەوانەش قیرتاوکردنی ڕێگای گەلیی باڵندە کە بەرەو ناوچەکانی نێروە و ڕێکان دەڕوات، جگە لە تەواوکردنی ئەو پڕۆژانە کە دەکەونە بناری چیای گارە و چیای مەتین.