لەدایکبووانی 2007 لە هەڵبژاردنی عێراق دەنگ دەدەن

ئاڤا نیوز

 

کۆمیسیۆن لە کارەکانی بۆ ڕێکخستنی هەڵبژاردنی داهاتووی پەرلەمانی عێراق بەردەوامە کە بڕیارە 11-11-2025 لە تەواوی عێراق بەڕێوە بچێت.

 

وێنە گەورەکە: کۆمیسیۆن ئێستا بە نوێکردنەوەی تۆماری دەنگدەرانەوە سەرقاڵە، بایۆمەتری بۆ ئەو کەسانە دەکرێت کە پێشتر نەیانکردووە و هەروەها ناوی لەدایکبووانی ساڵی 2007 بۆ ناو تۆماری دەنگدەران زیاد دەکرێن چونکە دەتوانن دەنگ بدەن. لەم چوارچێوەیەشدا لە 1079 ناوەند لە سەرتاسەری عێراق زیاتر لە یەک ملیۆن دەنگدەری نوێ تۆمار کراون.

لێدوانی فەرمی: نەبراس ئەبو سودە، یاریدەدەری وتەبێژی کۆمیسیۆنی هەڵبژاردنی عێراق، ڕایگەیاند، کۆمیسیۆن ئامادەیە لە کاتی دیاریکراودا هەڵبژاردن ئەنجام بدات. 

- کۆمیسیۆن ڕێکاری دیکەی بۆ ڕۆژی دەنگدان زیاد کردووە، کە کامێرای ناسینەوەی ڕوخسار لە ناوەندەکانی دەنگدان دادەنێت تا ئەگەر کەسێک کێشەی لە خوێندنەوەی پەنجەمۆری هەبوو بتوانێت لە ڕێگەی ڕووخساریەوە بناسرێتەوە و دەنگ بدات. 

لەلایەکی دیکەوە: کۆمسیۆنی هەڵبژاردنەکانی عێراق ڕایگەیاند لە ساڵانی 2018 و 2021 و 2023 زیاتر لە 60 هاوپەیمانێتی تۆمار کراون. ئیستاش ژمارەیەک هاوپەیمانێتیی نوێ هاتوونەتە ئاراوە کە ویستی خۆیان بۆ بەشداریکردن لە هەڵبژاردن نیشانداوە و هاوکات ژمارەیەک هاوپەیمانێتیش هەن کە لە درووستبووندان. تا ئیستا زیاتر لە 10 هاوپەیمانێتی، بە کۆن و نوێکانەوە، ویستی خۆیان بۆ خۆتۆمارکردن دەربڕیوە.