كونسوڵی گشتیی ئەمریكا: سەردانی مەسرور بارزانی بۆ واشنتۆن هەنگاوێكی گرنگە

ئاڤا نیوز

كونسوڵی گشتیی ئەمریكا لە هەرێمی كوردستان، سەردانە چاوەڕوانكراوەكەی سەرۆكی حكومەتی هەرێمی كوردستان بۆ واشنتۆن، بە هەنگاوێكی گرنگ بۆ برەودان بە پەیوەندییە دووقۆڵییەكان و هەماهەنگی زیاتری ئەمریكا و هەرێمی كوردستان لەبوارە جیاجیاكاندا ناودەبات.

چیرۆكی سەرەكی: سەفین دزەیی، بەرپرسی فەرمانگەی پەیوەندییەكانی دەرەوەی حكومەتی هەرێمی كوردستان، پێشوازی لە ستیڤ بیتنەر، كونسوڵی گشتیی ئەمریكا لە هەرێمی كوردستان كرد، هەردوولا گفتوگۆیان لەبارەی دوایین پێشهات و ڕووداوەکانی ناوچەکە و گرنگی سەردانی داهاتووی سەرۆکی حکومەتی هەرێمی کوردستان بۆ ویلایەتە یەکگرتووەکانی ئەمریکا کرد. جەخت لەسەر پتەوکردنی پەیوەندییە دووقۆڵییەکان و هەماهەنگی زیاتر لە بوارە جیاجیاکاندا کرایەوە، بەتایبەتی لە ڕووبەڕووبوونەوەی ئاڵنگارییە هاوبەشەکان و پاراستنی سەقامگیری لە ناوچەکەدا.

ڕاگەیێنراوی فەرمی: بەگوێرەی ڕاگەیێنراوی فەرمانگەی پەیوەندییەكانی دەرەوە، كونسوڵی گشتیی ئەمریكا، سەردانی چاوەڕوانکراوی مەسرور بارزانی، سەرۆکی حکومەتی هەرێمی كوردستان بۆ واشنتۆن، وەک هەنگاوێکی گرنگ وەسفكرد بۆ برەودان بە پەیوەندییەكانی ئەمریكا و هەرێمی كوردستان بەمەبەستی گفتوگۆکردن لەسەر پرسە هەنووکەییەکان.

لەلایەكی دیكەوە: لە درێژەی سەردانەکەیدا، کونسوڵی گشتیی ئەمریکا بەڕێوەبەرایەتییەکانی ناو فەرمانگەی پەیوەندییەكانی دەرەوەی بەسەرکردەوە، بەرپرسی فەرمانگە ئاماژەی بەو گۆڕانکاری و نوێکارییانە کرد کە لەپێناو باشترکردنی ئاستی کارکردن و پێشکەشکردنی خزمەتگوزارییەکان كراون، ستیڤ بیتنەر، پێزانینی خۆی بۆ کار و ماندووبوونی سەرجەم کارمەندان و هەماهەنگیی بەردەوامیان دەربڕی، هانی دان بۆ بەردەوامبوون لەسەر هەمان ڕیتم و گرنگیدان بە پەرەپێدانی تواناکانیان.