گەنجینەی ئەمریکا بۆ ئاڤا: بۆ سەقامگیربوونی سووریا سزاکانی سەر ئەو وڵاتە هەڵدەگرین

ئاڤا نیوز

دوای ئەوەی ترەمپ هەڵگرتنی سزاکانی سەر سووریای ڕاگەیاند، وەزارەتی گەنجینەی ئەمریکا بە ئاڤا میدیای وت، بڕیارەکەی سەرۆک ترەمپ جێبەجێدەکرێت بۆئەوەی سەقامگیری و ئاشتی بۆ سووریا بگەڕێتەوە.

چیرۆکی سەرەکی: لە میانی بەشداریکردنی لە کۆڕبەندی وەبەرهێنانی ئەمریکی - سعوودی، دۆناڵد ترەمپ، سەرۆکی ئەمریکا هەڵگرتنی سزاکانی سووریای ڕاگەیاند و وتی لەسەر داوای رەجەب تەیب ئەردۆغان، سەرۆککۆماری تورکیا و محەمەد بن سەلمان، شازادەی جێنشینی سعوودیە ئەو بڕیارەی داوە.

لێدوانی فەرمی: وتەبێژی وەزارەتی گەنجینەی ئەمریکا بە ئاڤا میدیای ڕاگەیاند، سەرۆک ترەمپ فەرمانی کردووە سزاکانی سەر سووریا ڕابگیرێن بۆئەوەی دەرفەتێکی گەورە بدرێت بە سوورییەکان. کەمکردنەوەی سزاکانی سەر سووریا بە مەبەستی سەقامگیر و هەنگاونانی سووریایە بەرەو ئاشتی.

زانیاریی زیاتر: ئەمریکا پێشتر هەنگاوی یەکەمی ناوە بۆ گەڕاندنەوەی پەیوەندییە ئاساییەکانی لەگەڵ سووریا و لەگەڵ دەسەڵاتدارانی کاتی ئەو وڵاتەدا کۆدەبێتەوە.

ئەوەی پێویستە بیزانیت: بەهۆی بەکارهێنانی توندووتیژی بەرامبەر بە خۆپیشاندەرانی ڕاپەرینی ساڵی 2011 سووریا، ئەمریکا تا ڕووخانی ڕژێمەکەی بنەماڵەی ئەسەد بەردەوام سزای بەسەر سووریادا دەسەپاند بۆئەوەی توانای ڕژێمی بەشار ئەسەد لە دابینکردنی ئەو سەرچاوانەی کە دژ بە هاوڵاتیانی سووری بەکاریدەهێنان کەمبکاتەوە.