شۆفێرێكی تاكسی شۆفێری ماتۆڕسكیلێك بە تووندی ئازار دەدات و ڕادەکات، پۆلیس دەستگیری دەکات

ئاڤا نیوز

پۆلیسی هەولێر شۆفێرێكی تاكسی دەستگیر دەكات، ئەوەش بەهۆی ئازاردانی شۆفێری ماتۆڕسكیلێكی دیلیڤەری بەشێوەیەكی دڕندانە و جێهێشتنی بە برینداری لەسەر شەقام.

چیرۆكی سەرەكی: دوای ئەوەی شەوی ڕابردوو لە شەقامی شەست مەتریی شاری هەولێر، شوفێرێکی تاکسی و شوفێرێکی ماتۆڕسکیلی (دیلیڤەری) لەسەر شکاندنەوەی ئۆتۆمبێل دەبێتە دەمەقاڵێیان، دواجار بەشەڕدێن و توندوتیژیی لێدەکەوێتەوە، شوفێری تاکسییەکە بە تووندی لە شۆفێری ماتۆڕسکیلەکە دەدات و زامداری دەکات و هەڵدێت، بەڵام دوای ئەوەی پۆلیس گەیشتە شوێنی ڕووداوەكە، دەست بە لێکۆڵینەوە کرا و دوای تۆمارکردنی سکاڵا، شوفێری تاکسییەکە لەلایەن تیمەکانی بەڕێوەبەرایەتی پۆلیسی هەولێر دەستگیرکرا.

لێدوانی فەرمی: نەقیب كارزان ساڵح، وتەبێژی پۆلیسی هەولێر تایبەت بە ئاڤا ڕایگەیاند، دوای ئاگاداركردنەوەی تیمەكانمان بە بوونی حاڵەتێكی برینداربوون، دەستبەجێ گەیشتینە شوێنی ڕووداوەكە و لەسەر سكاڵای ئەو ماتۆڕسكیلەی كە بەشێوەیەكی سەخت زامدار كرابوو، تۆمەتبارێكمان دەستگیركرد كە شۆفێری تاكسییە و دوای زامداركردنی ئەو هاووڵاتیە، هەڵاتووە. ئێستا پەڕاوی لێکۆڵینەوە بۆ تۆمەتبار کراوەتەوە و دراوەتە دادگا و لێکۆڵینەوەش لە ڕووداوەکە بەردەوامە.