ئێران لەبارەی بەرنامە ئەتۆمییەکەی لەگەڵ سێ وڵاتی ئەوروپی لە تورکیا کۆبوونەوە

ئاڤا نیوز

شاندەکانی ئێران و فەڕەنسا و بەریتانیا و ئەڵمانیا لە ئیستەنبووڵ لە تورکیا کۆبوونەوە. کۆبوونەوەکە بۆ گفتوگۆکردن بوو سەبارەت بە پڕۆگرامە ئەتۆمییەکەی ئێران و دانوستانەکانی ئەو وڵاتە لەگەڵ ئەمریکا.

وێنە گەورەکە: هەوڵەکان بۆ لێکنزیککردنەوە و ڕێککەوتنی ئەمریکا و ئێران لەبارەی بەرنامە ئەتۆمییەکەی تاران بەردەوامە، تائێستا کۆبوونەوە و دانوستانەکانی نێوان ئەو دوو وڵاتە بە ئەرێنی وەسف دەکرێت، بەڵام نەگەیشتوونەتە ڕێککەوتنی کۆتایی.

لێدوانی فەرمی: کازم غەریبئابادی، جێگری وەزیری دەرەوەی ئێران بۆ کاروباری یاسایی و نێودەوڵەتی، لە ڕێگەی تۆڕی کۆمەڵایەتیی ئێکسەوە ڕایگەیاند "بیروڕامان ئاڵوگۆڕ کرد و نوێترین دۆخی دانوستانە ناڕاستەوخۆ ئەتۆمییەکان و هەڵگرتنی سزاکانمان تاوتوێ کرد".

غەریبئابادی ئاماژەی بەوەش کردووە کە "ئەگەر پێویست بکات" ئێران و وڵاتانی ئەوروپی درێژە بە گفتوگۆکانی نێوانیان دەدەن.

زانیاریی زیاتر: بەگوتەی غەریبئابادی، ئێران سەبارەت بە کۆبوونەوەکانی لەگەڵ ئەمریکا زانیاریی بە ژمارەیەک لە وڵاتانی ناوچەکە، وڵاتانی ئەوروپا، ڕووسیا و چین دەدات.