ئیسرائیل: سەرکردەی حووسییەکانی یەمەن لەناو دەبەین

ئاڤا نیوز

دوای چەند کاتژمێر لە بەجێهێشتنی کەنداو لەلایەن دۆناڵد ترەمپەوە، ئیسرائیل هێرشەکانی بۆسەر حووسییەکانی یەمەن دەستپێکردەوە.

چیرۆکی سەرەکی: ئیسرائیل هێرشی کردە سەر پێگەی حووسییەکانی یەمەن و هەڕەشەی زیادکردنی هێرشەکانی بۆ کردنە ئامانجی سەرکردەی حووسییەکانی لە یەمەن دەکات.

بڵاوکراوەی فەرمی: تەلەفزیۆنی مەسیرەی سەر بە حووسییەکانی یەمەن ڕایگەیاند، فڕۆکەکانی ئیسرائیل بەندەری سەلیف و حودەیدەیان لە یەمەن کردووەتە ئامانج. هاوکات دوای نزیکەی کاتژمێرێک، سوپای ئیسرائیل هێرشی ئاسمانی بۆ سەر بەندەرەکانی حودەیدە و سەلیف لە یەمەن پشتڕاستکردەوە.

لێدوانی فەرمی: بنیامین نەتانیاهۆ سەرۆکوەزیرانی ئیسرائیل ڕایگەیاند، فڕۆکەکانی ئیسرائیل بە سەرکەوتووانە هێرشیان کردووەتە سەر دوو بەندەری حووسییەکان و هێرشەکان بەشێک بوون لە ئۆپراسیۆنی بەردەوامیان بۆ بە ئامانجگرتنی حووسییەکان.

ئاماژەی بەوەشکرد، ئامادەنین بە بێدەنگی بوەستن و ڕێگە بدەن حووسییەکان هێرش بکەنە سەریان، بۆیە بە تووندی هێرش دەکەنە سەر پێگە و سەرکردەکانیان.

ئەوەی پێویستە بیزانیت: ئەو هێرشانەی ئیسرائیل لەکاتێکدایە، دۆناڵد ترەمپ گەشتە سێ ڕۆژییەکەی بۆ وڵاتانی کەنداو کۆتایی پێهێنا و گەڕایەوە بۆ ئەمریکا کە پێش ئەم سەردانەی ئەمریکا بە نێوەنگیری عومان لەگەڵ حووسییەکان ڕێککەوتن بە ئاگربەست و نەکردنە ئامانجی کەشتییەکانی ئەمریکا لەلایەن حووسییەکان لە ناوچەکەدا.