کۆشکی سپی: یەکەم گەشتی ترەمپ پڕ بوو لە دەستکەوتی گەورە

ئاڤا نیوز

دوای کۆتاییهاتنی گەشتەکەی دۆناڵد ترەمپ بۆ وڵاتانی کەنداو، کۆشکی سپی، ڕایگەیاند، سەردانی یەکەمی سەرۆک سەرکەوتنێکی گەورەبوو بۆ ئەمریکا.

وێنە گەورەکە: لە میانی گەشتە سێ ڕۆژییەکەی بۆ وڵاتانی کەنداو دۆناڵد ترەمپ، سەرۆکی ئەمریکا ژمارەیەک ڕێککەوتنی لەگەڵ وڵاتانی سعودیە، قەتەر و ئیمارات واژۆکرد.

بڵاوکراوەی فەرمی: كارۆلین لیڤیت، وتەبێژی كۆشكی سپی لە ئەکاونتی خۆی لە تۆڕی ئێکس ڕایگەیاند، یەکەم گەشتی سەرۆکی ئەمریکا بۆ دەرەوەی وڵات سەرکەوتنێکی گەورەبووە و ڕێککەوتنی مەزنی بۆ ئەمریکا لێ بەرهەمهاتووە.

بەشێکی دیکە لە بڵاوکراوەکەی وتەبێژی كۆشكی سپی

لە سەردانەکەی سەرۆک ترەمپ سعوودیە بە بەهای 600 ملیار دۆلار وەبەرهێنانی لە ئەمریکا ڕاگەیاند، بەم پێیە سەردەمێکی مێژووی نوێی هاوبەش لە نێوان ئەمریکا و سعوودیە دەستپێدەکات.

هەر لە سەردانەکەیدا، ئەمریکا بە بەهای یەک تریلیۆن و 200 ملیار دۆلار ڕێککەوتی ئابووری لەگەڵ قەتەر واژۆکرد.

لە سێیەم ڕۆژی سەردانەکەشی بۆ وڵاتانی کەنداو، بە بەهای زیاتر لە 200 ملیار دۆلار ڕێککەوتنی بازرگانی لە نێوان ئەمریکا و ئیمارات واژۆکرا.

بە کۆی گشتی، سەرۆک ترەمپ زیاتر لە دوو تریلیۆن دۆلاری لە ڕێککەوتنی وەبەرهێنانی لەگەڵ ئەم سێ وڵاتەی ڕۆژهەڵاتی ناوەڕاست بۆ ئەمریکا مسۆگەر کرد و ڕێگەی خۆشکرد بۆ داهاتوویەکی سەلامەتتر و خۆشگوزەرانتر.