ترەمپ: ئێران دەیەوێت بگەینە ڕێککەوتن

ئاڤا نیوز

 

ئێوارەی ڕۆژی هەینی، دۆناڵد ترەمپ، سەرۆکی ئەمریکا ڕایگەیاند، تاران دەیەوێت لەگەڵ واشنتن سەبارەت بە بەرنامە ئەتۆمیەکەی بگاتە ڕێککەوتن.

 

وێنە گەورەکە: ئەمریکا و ئێران بەردەوامن  لە دانوستاندنەکانیان بۆ رێککەوتن لەسەر بەرنامە ئەتۆمییەکەی تاران و، تائێستاش چوار گەڕی دانوستاندنی ناڕاستەوخۆیان ئەنجامداوە بەڵام تا ئێستا نەگەیشتوونەتە ڕێککەوتنێکی گشتگیر.

 

لێدوانی فەرمی: دۆناڵد ترەمپ، سەرۆکی ئەمریکا بە فۆکس نیوزی ڕاگەیاند: پێم باش نییە پەنا بۆ جوڵەی سەربازی لەگەڵ ئێران ببەین و ناکرێت هەرگیز ببێتە خاوەنی چەکی ئەتۆمی. هاوکات گوتیشی، تارانی ئاگادار کردووەتەوە گەیشتن بە ڕێککەوتنێک سەربارەت بە بەرنامە ئەتۆمییەکەی لە بەرژوەندی ئەوان دەبێت و پێشنیازێکمان سەبارەت بە ڕێککەوتن بۆ تاران ناردووە.

 

لەلایەکی دیکەوە: ڕۆژی هەینی، عەباس عێراقچی، وەزیری دەرەوەی ئێران ڕایگەیاند، تاران هیچ پێشنیازێکی لە ئەمریکاوە سەبارەت بە ڕێککەوتنی ئەتۆمی پێنەگەیشتووە.

 

زانیاریی زیاتر: ئێران چەند مەرجێکی هەیە بۆ ڕێککەوتن لەگەڵ ئەمریکا لەوانەش، هەڵگرتنی سزاکان و ڕێگەدان بە ئێران بۆ پیتاندنی یۆرانیۆم بۆ بەکارهێنانی لە کەرتی ووزە.