کارەکانی لووتکەی عەرەبی لە بەغدا کۆتایی هات

ئاڤا نیوز

کۆبوونەوەی لووتکەی عەرەبی لە بەغدا کۆتایی هات و تێیدا کۆچ پێکردنی خەڵکی فەڵەستین ڕەتکرایەوە و داوا لە کۆمەڵگەی نێودەوڵەتی کرا بۆ ڕاگرتنی خوێنڕشتن لە غەززە فشاری زیاتر بکات، هاوکات داواشیکرد لە سووریا پرۆسەیەکی گشتگیریی سیاسیی دەستپێبکات.

وێنە گەورەکە: ئەمڕۆ شەممە لە بەغدا کۆبوونەوەی لووتکەی عەرەبی بەڕێوەچوو و لە ڕووی ئامادەبوونی کەسی یەکەمی وڵاتانەوە کەمترین ڕێژەی ئامادەبوونی تۆمارکرد، بەجۆرێک لە کۆی 22 وڵات، تەنیا شەش وڵات لە ئاستی کەسی یەکەم ئامادەبوون.

ڕاگەیێنراوی فەرمی: دوای کۆتاییهاتنی کارەکانی لووتکەی عەرەبی لە بەغدا، ڕاگەیێنراوی کۆتایی لوتکەکە بڵاوکرایەوە و تێیدا جەختکراوەتەوە کە کۆبوونەوەی لووتکە بە ئامانجی یەکخستنی هەوڵەکانە بۆ بەدیهێنانی بەرژەوەندییەکانی گەلانی ناوچەکە.

دەقی ڕاگەیێنراوی کۆتایی لووتکەی عەرەبی:

٠ بۆ ڕاگرتنی ڕشتنی خوێن لە غەززە فشاریی نێودەوڵەتی زیاتر بکرێت.

٠ بە هەموو شێوەیەک کۆچ پێکردنی خەڵکی فەڵەستین ڕەتدەکەینەوە.

٠ پێویستە هاوکاریی مرۆیی ڕەوانەی غەززە بکرێت.

٠ ئامانج لە لووتکەی عەرەبی یەکخستنی هەوڵەکان و بەدیهێنانی بەرژەوەندی گەلانی ناوچەکانمانە.

٠ دەستدرێژییەکانی ئیسرائیل بۆسەر سووریا سەرکۆنە دەکەین.

٠ ڕێگاچارەی سیاسی بۆ ڕاگرتنی ململانێکانی سوودان بدۆزرێتەوە.

٠ کێشەکانی لیبیا بە دانوستان و گفتوگۆی نیشتیمانی چارەسەر بکرێن.

٠ هەموو لێکتێگەیشتن و ڕێککەوتنەکان جێبەجێ بکرێن بۆ ڕاگرتنی دەستدرێژییەکانی سەر لوبنان.

٠ هاوسۆزی تەواوی یەمەنین و پشتیوانی لە هەوڵەکانی بەدیهێنانی ئاسایش و کۆتاییهێنان بە شەڕ و دابەشکاریی دەکەین.